BE-ja ka thënë se do të ndihmojë Bosnjën të mbulojë koston e një qendre të re për emigrantët dhe refugjatët, pasi autoritetet në Bosnjë të kenë rënë dakord për një vend të përshtatshëm për të.
Jamila Miloviç Haliloviç, zëdhënëse e Delegacionit të BE-së në Bosnje, tha për BIRN se BE i ishte përgjigjur tashmë kërkesës së Bosnjës për më shumë ndihmë në strehimin e një numri në rritje të emigrantëve dhe refugjatëve dhe se do ta ndihmonte më shumë sapo autoritetet e Bosnjës të binin dakord mbi vendet ku do t’i vendosin ata.
Rreth 3,000 azilkërkues dhe refugjatë janë aktualisht në kantonin Una Sana të Bosnjës, një nga dhjetë kantonet në entitetin e Federatës të Bosnjës, duke pritur vendimin se ku do të vendosen.
Një zgjidhje e propozuar nga Këshilli i Ministrave të Bosnjës është përdorimi i një ish-fabrike biskotash Agrokomerc, e cila ka qenë jashtë përdorimit prej vitesh.
Megjithatë, Kantoni Una Sana e kundërshton këtë ide, duke thënë se kjo do të përbënte një rrezik sigurie që policia lokale nuk do të ishte në gjendje të përballonte.
“Sa më shpejt që autoritetet boshnjake do të jenë në gjendje ta bëjnë këtë, aq më shpejt BE-ja mund të japë mbështetjen e saj,” tha zëdhënësja e BE.
“Komisioni ka ndarë tashmë 1.5 milion euro ndihmë humanitare për të trajtuar nevojat e menjëhershme të refugjatëve, azilkërkuesve dhe emigrantëve në Bosnje,” kujton Milovic Haliloviç.
Megjithatë, Ministri i Sigurisë i Bosnjës, Dragan Mektiç, të mërkurën tha se Bosnja nuk i kishte marrë ende paratë.
“Disa zyrtarë po përmendin miliona, por ende nuk kemi marrë asnjë qindarkë për të rregulluar gardhin ku janë vendosur aktualisht emigrantët,” tha Mektiç duke premtuar ofrimin e përkohshëm të çadrave të pajisura me ajër të kondicionuar dhe ngrohje para fillimit të punës në Agrokomerc.
BE-ja ka investuar tashmë 24.6 milionë euro në mbështetje të Bosnjës në migracionin dhe menaxhimin e kufijve që nga viti 2007.
Sipas Milovic Halilovic, kjo është pjesë e mbështetjes së përgjithshme të BE-së prej 750 milion eurosh që i janë dhënë Bosnjës që nga viti 2007, përfshirë ndihmën për reformat dhe investimet e bëra për të përmirësuar jetën e qytetarëve dhe për ta sjellë vendin më pranë standardeve të BE-së.
Emigracioni është një çështje në rritje në Ballkanin Perëndimor. Nga janari deri në fund të majit, Bosnja, Mali i Zi dhe Shqipëria regjistruan më shumë se 6,700 emigrantë të rinj dhe refugjatë në rrugën e tyre drejt BE-së në një rrugë të re ballkanike, që është më shumë se dyfishi i 2,600 të regjistruarve në të tri vendet gjatë gjithë vitit 2017.
Raportet e medias thonë se emigrantët dhe refugjatët që kalojnë Ballkan vijnë kryesisht nga Siria, Pakistani, Afganistani, Algjeria, Libia, Maroku, Palestina dhe Iraku.