Me mungesën e deputetëve të opozitës dhe me presidentin që vazhdon të refuzojë ta firmosë atë, parlamenti i Maqedonisë të enjten ratifikoi përsëri marrëveshjen historike me Greqinë për emrin e saj.
Parlamenti i Maqedonisë të enjten ratifikoi marrëveshjen me Greqinë për herë të dytë dhe me të njëjtin raport të deputetëve.
Edhe një herë, 69 nga 120 deputetët votuan në favor të marrëveshjes ndërsa njëri abstenoi. Asnjë deputet nuk votoi kundër, pasi i gjithë blloku i opozitës, i udhëhequr nga ish-partia qeverisëse VMRO DPMNE, e bojkotoi seancën.
Votimi i dytë erdhi pak kohë pas të parit, i cili u mbajt më 20 qershor, dhe pasi presidenti Gjorge Ivanov refuzoi të ratifikonte një marrëveshje të cilën, njësoj si opozita, ai e quajti një mposhtje kombëtare.
Pas ratifikimit të dytë të parlamentit, presidenti është i detyruar të nënshkruajë marrëveshjen, por mund të mos ngutet ta bëjë këtë, pasi as kushtetuta dhe as ligjet maqedonase nuk parashikojnë afate.
Para votimit, disa deputetë raportuan se kanë marrë letra kërcënuese, në të cilat një dërgues pa emër tha se ata do të mbahen përgjegjës për tradhti të lartë nëse ata e mbështesin ratifikimin për herë të dytë.
Refuzimi i presidentit për të nënshkruar ratifikimin nuk pritet të prishë marrëveshjen historike të nënshkruar më 17 qershor, me të cilën Maqedonia ra dakord të ndryshojë emrin e saj në “Republika e Maqedonisë së Veriut” në këmbim të anëtarësimit më të shpejtë në NATO dhe fillimin e bisedimeve të pranimit në BE, që Greqia i kishte bllokuar në të kaluarën.
Pas ratifikimit të parë, Greqia dërgoi letra në BE dhe NATO, duke thënë se pengesat e mëparshme ndaj marrëveshjes së Greqisë tashmë janë hequr.
Si rezultat, BE-ja ka caktuar një marrëveshje të kushtëzuar për Maqedoninë për të filluar bisedimet e pranimit, me kusht që të përfundojë një sërë reformash, ndërsa NATO pritet ta ftojë direkt vendin për t’iu bashkuar samtit të tij të ardhshëm të planifikuar për më 11-12 korrik.
Pjesa më e vështirë e zbatimit të marrëveshjes është padyshim referendumi i ardhshëm në Maqedoni, që pritet të caktohet për në fund të shtatorit ose në fillim të tetorit.
Nëse qeveria nuk arrin të bindë dot shumicën e qytetarëve për ta mbështetur atë, e gjithë marrëveshja mund të hiqet, rast në të cilin anëtarësimi në BE dhe NATO do të bllokohet sërish.