Hetimet për dhunimin e avokatit Ilia Ilia disa ditë më parë pranë Gjykatës së Durrësit, kaluan në prokurorinë e kryeqytetit, pas akuzave të avokatit ndaj Arjan Ndojës prokuror në Durrës. Ndërkohë Dhoma e Avokatisë në Durrës vendosi të protestojë duke bojkotuar gjyqet për dy ditë.
Hetimi për dhunimin e avokatit Ilia Ilia disa ditë më parë pranë Gjykatës së Durrësit, i ka kaluar për kopetencë Prokurorisë së Tiranës, pas akuzave të avokatit se pas dhunës ishte Arjan Ndoja prokuror i Durrësit.
Këshilltari për mediat i Prokurorisë së Përgjithsme Denion Ndrenika, tha se ishte “rregjistruar procedimi penal bazuar në nenin 316 të Kodit Penal”, i cili përfshin “goditjet dhe vepra të tjera dhune që i bëhen gjyqtarit apo anëtarëve të trupit gjykues, prokurorit, avokatit, ekspertëve, çdo arbitri të caktuar për një çështje, për ta penguar në kryerjen e detyrës”.
Hetimet për çështjen janë kaluar ndërkohë në Tiranë, për shkak të dyshimeve dhe akuzave mbi prokurorin e Durrësit Ndoja. Ky i fundit nuk qe e mundur të arrihej për një koment. Më herët Ndoja ka mohuar akuzat.
Ndërkohë Dhoma e Avokatisë në Durrës vendosi që të gjithë avokatët e saj të bojkotonin për dy ditë në shenjë proteste gjykimin e çështjeve penale, civile dhe administrative që do të zhvillohen në Gjykatën Durrës, atë Administrative, në Gjykatën e Apelit, si edhe në Gjykatën e Kavajës. Protesta zhvillohet më 26 dhe 27 korrik, ndërsa Dhoma e Avokatisë bëri me dije se kërkonte zbardhjen e ngjarjes. Avokatët do të marrin pjesë vetëm në seancat e masave të sigurisë.
Dhoma shpjegoi se vendim u mor pas dhunimit të avokatit Ilia Ilia të enjten e kaluar, përpara Gjykatës dhe Prokurorisë së Durrësit ku ai u godit nga dy persona, për të cilët pretendoi se i kishte identifikuar dhe sipas tij njëri ishte ish-shoqërues (shofer) i prokurorit të Durrësit Arjan Ndoja.
Në një bisedë telefonike për BIRN, avokati Ilia i falenderoi kolegët për solidarizimin. Policia e Durrësit ditën e ngjarjes njoftoi se kishte identifikuar 42 vjeçarin me iniciale M.V., banues në fshatin Halil të Krujës, i cili së bashku me një bashkëpunëtor kanë goditur avokatin. Punonjës në zyrën e shtypit në Policinë e Durrësit bënë me dije për BIRN se personi ishte shpallur në kërkim, po nuk kishte të të reja mbi ngjarjen.
Ndrenika tha se Prokuroria e Përgjithshme po ndiqte me vëmendje zhvillimet në këtë rast, ndërsa sqaroi se nuk ka pasur masa disiplinore dhe se të tilla mund të aplikoheshin vetëm nëse vinte një kërkesë nga Prokuroria e Durrësit.
