Pasi parlamenti më në fund emëroi një komision të ri zgjedhor, Maqedonia po fillon përgatitjet për referendumin e vjeshtës për marrëveshjen e saj historike me Greqinë për çështjen e emrit.
Kryeministri maqedonas Zoran Zaev tha se shpresonte që parlamenti të miratojë një vendim formal në mbështetje të referendumit mbi marrëveshjen e vendit me Greqinë deri të hënën – që ai shtoi më pas se do të organizohej me ose pa mbështetjen e partisë kryesore opozitare VMRO DPMNE.
“Nëse nuk arrijmë një marrëveshje me VMRO DPMNE-në, pres që secili nga deputetët e tyre individualisht t’i bëjnë të qarta pozicionet e tyre para publikut. Kjo është e drejta e tyre, por ne të gjithë kemi detyrimin të sigurohemi që procesi të jetë i suksesshëm,” tha Zaev të mërkurën.
Të mërkurën, me pjesëmarrjen e deputetëve të VMRO DPMNE, parlamenti votoi për emërimin e një komision të ri zgjedhor, të cilin partia e kishte bllokuar më parë për gati një muaj.
Parlamenti në të njëjtën kohë miratoi disa ligje të tjera të kërkuara nga opozita, përfshirë një dispozitë që garantoi krijimin e një qeverie teknike 100 ditë përpara zgjedhjeve të ardhshme, për të garantuar që ato të ishin zgjedhje të drejta.
Kjo erdhi pasi qeveria dhe opozita ranë dakord mbi këto çështje të hënën, pavarësisht se nuk arritën të bien dakord mbi kërkesën kryesore të qeverisë – e cila është që opozita t’u kërkojë anëtarëve të saj të votojnë në referendum.
Opozita e ka kundërshtuar ashpër marrëveshjen me Greqinë, duke e quajtur atë një akt tradhtie, pasi ajo përfshin ndryshimin e emrit të vendit.
Por vëzhguesit thonë se pjesëmarrja e opozitës mund të jetë vendimtare për suksesin e referendumit, edhe nëse kundërshtojnë marrëveshjen e “emrit”.
Pa të, shumë vëzhgues thonë se do të jetë shumë e vështirë të arrihet një pjesëmarrje prej më shumë se 50 për qind e të gjithë votuesve, që është pragu i vendosur.
Zaev të mërkurën e la derën e hapur për një marrëveshje të mëvonshme, pas dështimit të takimit të tij me kreun e VMRO DPMNE, Hristijan Mickovski.
Ai tha se bisedimet po vazhdonin brenda parlamentit dhe se Mickovski mund të kërkonte një takim tjetër me të nëse ai dëshironte.
Një synim kryesor i marrëveshjes me Greqinë, e nënshkruar më 17 qershor, është të sigurojë që Greqia të përfundojë bllokimin e saj të gjatë të anëtarësimit të Maqedonisë në NATO dhe BE.
Sipas marrëveshjes, Maqedonia ra dakord të ndryshojë emrin e saj në Republika e Maqedonisë së Veriut, ndërsa Greqia ra dakord të heqë veton për integrimin e Maqedonisë në BE dhe NATO.
Megjithatë, që marrëveshja të vihet plotësisht në zbatim, maqedonasit duhet të tregojnë se e mbështesin atë në një referendum.
Qeveria e drejtuar nga Social Demokratët dëshiron që votimi të mbahet në fund të shtatorit ose në fillim të tetorit, në mënyrë që të ketë kohë për të miratuar ndryshimet e nevojshme kushtetuese deri në fund të vitit.
