Të mërkurën pati raportime të reja të përdorimit të dhunës nga ana e policisë kroate ndaj emigrantëve që përpiqeshin të kalonin kufirin nga Bosnja.
No Name Kitchen, NNK, një OJQ që ndihmon emigrantët dhe refugjatët në Bosnje dhe Hercegovinë, të mërkurën në rrjetet sociale akuzoi policinë kroate për rrahjen e një emigranti dhe e dokumentoi pretendimin e saj me një fotografi të kurrizit të tij të lënduar.
Ajo tha se vullnetarët e saj po darkonin të martën në qytetin Velika Kladusës kur personi mbërriti aty dhe u kërkoi t’i shikonin plagët.
“Ai ishte rrahur me një shkop gome disa herë dhe gjithashtu ishte qëlluar me çizme në fytyrë. Ne nuk donim të publikonim fotografi të fytyrës së tij, pasi ai mund të ketë probleme më pas,” tha NNK për BIRN.
Ai, me sa duket, u kthye nga përpjekja për të arritur në Bashkimin Europian kur tha se policia kroate e rrahu atë dhe miqtë e tij.
Policia kroate nuk iu përgjigj kërkesës së BIRN për një koment në lidhje me këtë pretendim.
Një numër në rritje refugjatësh dhe emigrantësh që kalojnë përmes Bosnjes dëshirojnë të hyjnë në BE përmes Kroacisë dhe pastaj të kërkojnë azil në Europën Perëndimore.
Një nga pikat e nxehta të tranzitit është kufiri boshnjak me Kroacinë, rreth qyteteve të vogla të Bihacit dhe Velika Kladusës, në Bosnjën veriperëndimore.
Shifrat e emigrantëve që shkojnë drejt veriut nga Greqia nëpërmjet Shqipërisë, Malit të Zi dhe Bosnjës janë dyfishuar që nga viti i kaluar, ndërsa Bosnja tani përpiqet të strehojë dhe të ushqejë rreth 5,000 persona.
Asnjë nga këta njerëz nuk dëshiron të qëndrojë në Bosnje. Shumica përpiqen të kalojnë kufirin drejt Kroacisë, por pengesat janë të frikshëm, nga pyjet dhe lumenjtë, deri te minat e tokës dhe një polici kroate aspak mikpritëse.
Amnesty International, NNK, si dhe një sërë organizatash joqeveritare kroate dhe media kanë dokumentuar raste të shumta të policisë kroate që përdor dhunë.
BIRN dëgjoi histori të ngjashme nga refugjatët dhe emigrantët me të cilët foli në Bihac më 23 korrik. Duke refuzuar t’u përmenden emrat, ata folën për dhunën fizike, për konfiskimin ose shkatërrimin e sendeve personale dhe për konfiskimin e parave dhe telefonave celularë.
Më 19 korrik, Federata Ndërkombëtare e Shoqatave të Kryqit të Kuq dhe Gjysmëhënës së Kuqe tha se dhjetëra njerëz po trajtoheshin çdo ditë për lëndime të pësuara gjatë përpjekjes për të kaluar nga Bosnja në Kroaci.
Boris Pavelic, një gazetar që shpesh raporton mbi këtë çështje, tha për BIRN se një dhunë e tillë mund të parandalohet vetëm nga presioni serioz publik ndaj qeverisë dhe policisë.
Paveliç tha se gazetarët dhe aktivistët duhet të patrullojnë kufirin së bashku me policinë, në të gjitha kushtet, ditën dhe natën, edhe në terrenin më të vështirë.
“Kjo nuk do t’i jepte fund dhunës plotësisht, por do ta zvogëlonte atë. Por unë kam frikë se dhuna nuk mund të ndalet tërësisht, sigurisht jo me këtë politikë anti-emigruese të Bashkimit Europian,” tha ai për BIRN.
Më 24 korrik, ministri kroat i mbrojtjes Davor Bozinoviç hodhi poshtë akuzat për brutalitetin e policisë, duke thënë se autoritetet vepruan vetëm në përputhje me ligjin kroat dhe atë të BE-së.
Më 29 korrik, Bashkimi Policor Kroat, SPS, hodhi poshtë raportet e medias për trajtimin çnjerëzor të emigrantëve dhe lavdëroi policinë për punën e tyre në ruajtjen e kufirit.
Shoqata e gazetarëve kroatë, HND, u përgjigj më 30 korrik, duke thënë se SPS kishte treguar mungesë mirëkuptimi sesi funksionon gazetaria dhe duke e akuzuar SPS-në për ndërhyrje në të drejtën e mediave për të bërë lirisht punën e tyre dhe për të ushtruar presion mbi lirinë e medias.