Presidenti Hashim Thaçi tha se një “korrigjim” i kufirit të Kosovës me Serbinë jugore, jo ndarje e vendit përgjatë vijave etnike, do të jetë një faktor në marrëveshjen përfundimtare të Prishtinës në normalizimin e marrëdhënieve me Beogradin.
Hashim Thaçi tha në një konferencë të jashtëzakonshme për shtyp të mërkurën se me Beogradin mund të arrihet një marrëveshje që komunat me shumicë shqiptare të Serbisë jugore – Preshevë, Medvegjë dhe Bujanoc – të bëhen pjesë e Kosovës.
“Kjo nuk do të thotë ndarje e Kosovës, një shkëmbim territoresh apo autonomi për serbët në veri të Kosovës, por një korrigjim të kufirit dhe njohje dhe anëtarësim për Kosovën në të gjitha mekanizmat ndërkombëtarë,” tha Thaçi.
Kritikët argumentojnë se “korrigjimet kufitare” do të ndajnë dy shtetet përgjatë vijave etnike dhe do të destabilizojnë rajonin, edhe pse Thaçi i ka përshkruar pretendimet se ai po sugjeron ndarjen e Kosovës si “lajme të rreme”.
Më shumë se 30 OJQ nga Kosova dhe Serbia i bënë thirrje Bashkimit Europian të martën të bëjë një deklaratë të qartë kundër ndarjes dhe shkëmbimit të territoreve.
Propozimi i Thaçit ndoshta do të diskutohet muajin e ardhshëm kur dy presidentët e Kosovës dhe Serbisë të rifillojnë bisedimet e tyre në Bruksel.
Duke e quajtur fazën aktuale të bisedimeve me Serbinë “të vështirë”, por “të nevojshme”, Thaçi tha se “duhet të përdorim çdo mundësi për të arritur një marrëveshje historike nëpërmjet dialogut”.
Thaçi premtoi gjithashtu krijimin e Asociacionit të Komunave Serbe – një çështje që ka rritur tensionet midis Kosovës dhe Serbisë – projekt statuti për të cilën duhet të përfundonte më 4 gusht.
Ekipi që dorëzoi draft statutin pritet të kërkojë ndryshime ligjore për asociacionin, që do të përfaqësojë interesat e serbëve në Kosovë, që të ketë kompetenca mbi sektorë të ndryshëm të arsimit, shëndetësisë dhe ekonomisë.
Asociacioni u pajtua fillimisht në bisedimet Prishtinë-Beograd në Bruksel.
“Kosova do të përmbushë detyrimet e saj në lidhje me marrëveshjet e Brukselit të vitit 2013 dhe 2015,” premtoi Thaçi.