Shoqatat e gazetarëve dënojnë ashpër sulmin dhe i bëjnë thirrje Policisë së Shtetit që të hedhë sa më parë dritë mbi ngjarjen që synon të frikësojë gazetaren Lala dhe cënon edhe më tej klimën e lirisë së shprehjes në Shqipëri.
Televizioni News 24 raportoi se shtëpia e prindërve të gazetares Klodiana Lala u sulmua me breshëri automatiku në orët e para të mëngjesit të së enjtes. Sipas pamjeve të publikuara nga News 24, shenja të plumbave gjendeshin në muret e shtëpisë dhe në derën kryesore të saj, ndërkohë që raportohet se policia ka gjetur 10 gëzhoja në vendngjarje. Në momentin e sulmit, sipas raportimit të News 24, në banesë gjendeshin familjarët e gazetares Lala dhe dy vajzat e saj të mitura.
Përmes një njoftimi për shtyp, edhe Policia e Tiranës e konfirmoi ngjarjen dhe tha se po punohet për sqarimin e rrethanave.
“Në lagjen Bruk në rrugën Shkëndija është qëlluar me armë zjarri në drejtim të pjesës së jashtme të banesës së shtetasit A.L, rreth 64 vjeç. Nuk ka dëme në njerëz. Po punohet për sqarimin e rrethanave të ngjarjes, identifikimin dhe kapjen e autorëve,” thuhet në njoftimin e policisë.
Klodiana Lala është gazetare e News 24 dhe mbulon prej më shumë se një dekade raportimin e çështjeve të kriminalitetit dhe sistemit gjyqësor në Shqipëri. Ajo ka raportuar gjithashtu mbi hetime të kryera ndaj figurave të krimit të organizuar.
Në një njoftim për median, Unioni i Gazetarëve Shqiptarë denoncoi me forcë sulmin e kryer dhe i bëri thirrje Policisë së Shtetit që të hetojë ngjarjen me urgjencë dhe të dërgojë autorët para drejtësisë, pasi “çdo vonesë do të ndikojë edhe më shumë në acarimin e klimës së lirisë së shprehjes në Shqipëri”. Unioni shton se kishte komunikuar me gazetaren Lala, e cila ka thënë se “sulmi është tentativë e pastër për ta frikësuar dhe ka ndodhur për shkak të detyrës së saj si reportere”.
“Policia nuk duhet të merret me detaje që çorodisin më shumë opinionin, por të gjejë autorin ose autorët e kësaj ngjarjeje shumë të rëndë. Kur sulmohet lajmësi, rrezikohet rëndë një nga të drejtat themelore kushtetuese,” thuhet në deklaratën e Unionit të Gazetarëve Shqiptarë.
“Ne u bëjmë thirrje institucioneve shqiptare që nga Presidenti i Republikës, Kryeministri dhe veçanërisht Ministria e Brendshme të reagojnë menjëherë, duke dënuar ashpër sulmin dhe të merren në mbrojtje reporterët,” thuhet në njoftimin e shpërndarë nga Unioni.
Sulmi me armë është dënuar ashpër edhe nga Shoqata e Mediave Elektronike Shqiptare, Shoqata e Gazetarëve Profesionistë të Shqipërisë dhe Lidhja e Gazetarëve të Shqipërisë, të cilët i kërkuan Policisë së Shtetit të hedhë sa më shpejt dritë mbi ngjarjen.
“Breshëria e plumbave e lëshuar mbi shtëpinë e saj është këmbanë alarmi që bie fort për rrezikun që u kanoset gazetarëve në kryerjen e detyrës së tyre të përditshme. Ky është një sulm i paprecedent kundër një gazetarje që ka guxuar të denoncojë raste korruptive e kriminale, si dhe kundër gjithë medias dhe fjalës së lirë,” thuhet në deklaratën e përbashkët të organizatave.
