Gjykata e Lartë njoftoi se për një post anëtari nga gjykatat e apelit të rretheve kanë mbërritur dy kandidatura, Brikena Ukperaj nga Gjykata e Apelit Vlorë dhe Luan Dervishi nga Apeli i Shkodrës.
Dy gjyqtarë nga gjykatat e apelit jashtë Tiranës kanë paraqitur kandidaturat e tyre për një post anëtari në Këshillin e Lartë të Drejtësisë pas thirrjes së hapur nga Gjykata e Lartë më 1 gusht. Brikena Ukperaj nga Gjykata e Apelit Vlorë dhe Luan Dervishi nga Apeli i Shkodrës dorëzuan kandidimin e vet në Gjykatën e Lartë, bëri të ditur zyrta e shtypit të kësaj gjykate.
Sipas CV-së zyrtare të publikuar nga Gjykata, Brikena Ukperaj ka mbaruar shkollën e magjistraturës në vitin 2006 dhe është gjyqtare në Apelin e Vlorës që nga viti 2016. Dervishi ka mbaruar studimet e drejtësisë në vitin 1985 dhe është gjyqtar në Apelin e Shkodrës që nga viti 2007.
Gjykata e Lartë thotë se pas përfundimit të afatit më 6 shtator, ajo do të kryejë verifikimin e kritereve formale të kandidatëve. Ukperaj e ka kaluar tashmë procesin e vetingut në rolin e anëtares së Këshillit të Emërimeve në Drejtësi. Por vlerësimi i KPK për aftësitë e saj profesionale ishte “minimal“. Ajo u kritikua veçanërisht për zbardhjen me vonesë të një vendimi gjyqësor të rëndësishëm të njohur si “Dosja e Karaburunit” si dhe për zvarritjen e dy gjyqeve të tjera, për të cilat mori edhe vlerësimin “minimal” në aftësitë profesionale.
Gjyqtari Dervishi nuk i është nënshtruar procesit të vetingut.
Këshilli i Lartë Gjyqësor është institucioni i ri që do të zëvendësojë Këshillin e Lartë të Drejtësisë për anën e gjyqtarëve. Anëtarët e KLGJ-së do të zgjidhen nga bledhja e Përgjithshme e Gjyqtarëve të të gjitha niveleve. Ligji thotë se njëri nga anëtarët duhet të jetë gjyqtar i Gjykatës së Lartë. Aktualisht për KLGJ kanë kandiduar dy anëtarë të Gjykatës së Lartë, Artan Zeneli dhe Medi Bici. Zeneli u shkarkua nga vetingu më 18 korrik ndërsa gjyqtari 61 vjeçar Medi Bici u konfirmua. Si kandidati i vetëm i mbetur, ai pritet të jetë anëtari i ardhshëm i Këshillit të Lartë Gjyqësor nga rradhët e Gjykatës së Lartë, me një mandat pesëvjeçar me kohë të plotë, gjë që pritet të krijojë edhe një vakancë shtesë në Gjykatën e Lartë, e cila ka mbetur sakaq me 4 anëtarë.
Ligji thotë gjithashtu se dy anëtarë duhet të jenë gjyqtarë apeli, ku së paku njëri duhet të jetë nga jashtë Tiranës. Problemi është se aktualisht nga tre kandidatë të gjykatave të apelit, kanë mbijetuar vetëm dy, Ilir Toska nga apeli i Tiranës dhe Nertina Kosova nga Gjykata e Apelit për Krimet e Rënda. Kandidati i vetëm apeli nga jashtë Tiranës, Besim Trezhnjeva u rrëzua.
Kjo ishte arsyeja se pse thirrja për një anëtar nga apelet e rretheve u rihap.
