Mali i Zi lajmëroi të enjten se do të marrë deri në pesë vetë nga anija e mbushur me emigrantë që u mbajtë për ditë me radhë e ankoruar në brigjet e Italisë.
Qeveria e Malit të Zi ka thënë se do të marrë deri në pesë refugjatë dhe emigrantë të cilët zbritën në një port në Sicili pasi autoritetet italiane i mbajtën ata në anije për ditë të tëra.
“Qeveria, pasi pranoi parimet e humanizmit dhe solidaritetit për njerëzit në nevojë si një vlerë tradicionale të shoqërisë malazeze, të konfirmuara shumë herë në historinë tonë, vendosi që Mali i Zi duhet të pranojë deri në pesë emigrantë nga anija “Diciotti”,” tha qeveria në profilin e saj në Tëitter të enjten në mbrëmje.
Mali i Zi konfirmoi më 30 gusht se ishte kontaktuar nga Italia dhe i ishte kërkuar të merrte një numër emigrantësh dhe refugjatësh, për të ndihmuar në dhënien fund të një qëndrimi 10-ditor në anijen e ankoruar në brigjet italiane në Katanja.
Podgorica tha atëherë se po mendonte ende nëse mund të merrte emigrantët dhe refugjatët me origjinë afrikane, por nuk kishte marrë ende një vendim.
“Njëzëri, qeveria e Malit të Zi konfirmon angazhimin e saj ndaj sistemit të vlerave europiane dhe afirmon dinjitetin njerëzor,” tha ajo në Tëitter të enjten.
Anija mbërriti më 19 gusht me 177 emigrantë në bord, por Ministria e Brendshme italiane u mohoi atyre të drejtën për të zbarkuar, duke u bërë thirrje vendeve anëtare të BE-së që të ndihmojnë për t'i shpërndarë ata fillimisht.
Thuhet se 27 të mitur të pashoqëruar u lejuan të zbrisnin nga anija më 22 gusht, të ndihmuar nga Kryqi i Kuq, UNHCR dhe Save the Children.
Zv/kryeministri i Italisë, Matteo Salvini, i cili kryeson partinë anti-migrante Lidhja, nuk pranoi t'i linte emigrantët të zbrisnin nga “Diciotti” derisa vendet e tjera të BE-së të pranonin të merrnin disa prej azilkërkuesve, shumica e të cilëve ishin të rinj nga Eritrea.
Autoritetet italiane thonë se rreth 650,000 njerëz kanë arritur në Itali nga Afrika e Veriut që nga viti 2014 dhe qeveria e re populiste e vendit është zotuar ta ndalë rritjen e numrit.
Deri më tani, vetëm Irlanda dhe Shqipëria janë ofruar të ndihmojnë për emigrantët, duke rënë dakord të marrin disa prej emigrantëve që kanë ngelur në bregdetin italian.
Ndërkohë, shumë prej emigrantëve që u mbajtën për disa ditë në anijen “Diciotti” në portin e Katanjas po mbahen në qendrën e Kishës, rreth 20 kilometra në juglindje të Romës.
Mali i Zi, Shqipëria dhe Bosnja kanë parë një rritje të numrit të refugjatëve dhe emigrantëve që shkojnë në veri drejt Kroacisë anëtare të BE-së që nga fillimi i vitit 2018 – gjithsej 6,700 nga janari deri në fund të majit, më shumë se dyfishi i numrit të regjistruar në këto tre vende për të gjithë vitin 2017.
Në pesë muajt e parë të këtij viti, qeveria e Malit të Zi regjistroi rreth 1,500 kalime të paligjshme, shumë më tepër se një vit më parë.