Inspektorati Kombëtar i Mbrojtjes së Territorit njoftoi pushimin nga puna të katër inspektorëve, të cilët u shfaqën në një video amatore duke treguar se po të japësh para, ndërtimi pa leje nuk të shembet.
Një video amatore që tregon disa zyrtarë të IKMT duke diskutuar me njëri-tjetrin se kush jep para, shpëton nga shembja ndërtimin pa leje, solli shkarkimin e tyre nga puna ndërsa ekspozoi atë që duket praktikë e gjithëpërhapur ryshfeti në këtë strukturë ligjzbatuese.
Videoja paraqet punonjësit e IKMT në një lokal ku njëri prej tyre dëgjohet duke i thënë një pronari objekti se “duhej të kishte lëvizur dhe të jepte diçka” nëse dëshironte të shmangte shembien e hotelit të tij në plazhin e Jalit, ku IKMT dhe forca të shumta policore dhunuan banorët në tentativë për të shembur disa objekte. Video u transmetua në Fax News.
Duke pranuar vërtetësinë e videos, IKMT njoftoi shkarkimin e inspektorëve Jurian Mina, Alesio Haxhiraj, Olti Shabani dhe Vilson Lalaj, të katërt nga zyra e IKMT Vlorë.
” Vendimi i kryeinspektores Bici ka ardhur pas shfaqjes në media të një regjistrimi ku përfshiheshin edhe inspektorët e IKMT në biseda të dyshimta me poseduesit e objekteve të prishura gjatë aksionit të fundit në Jalë,” thuhet në njoftim.
IKMT është krijuar nga qeveria aktuale dhe ka qenë përgjegjëse për shembjen e dhjetëra ndërtimeve në të gjithë territorin e vendit.
IKMT ishte institucioni i shënjestruar veçmas edhe nga raporti i Departamentit të Shtetit për Klimën e Investimeve, si një institucion që shkel procedurat dhe procesin e rregullt ligjor.
“Agjencia e ngarkuar me shkatërrimin e ndërtesave pa leje shpesh vepron pa konsultim të plotë dhe dështon të ndjekë procedurat,” thuhet në raport.
“Ka pasur raportime të besueshme që qeveria shkatërroi disa shtëpi pa proces të rregullt ligjor si pjesë e një fushate më të gjerë për shembjen e ndërtimeve pa leje. Qytetarët dorëzuan ankesa se INUK ka injoruar kërkesat e shtetasve për të shkatërruar disa ndërtime pa leje ndërsa ka zgjedhur të shkatërrojë të tjera për të cilat qytetarët nuk janë ankuar.”
