Gjykata e Shkallës së Parë në Shkodër ka lënë të lirë të gjithë mjekët e personelin e spitalit të arrestuar pak ditë më parë, me akuzën e shpërdorimit të detyrës. Katër nga të ndaluarit u liruan me garanci pasurore, ndërsa tre të tjerë u lanë të lirë apo me masë “detyrim paraqitjeje”. Gjatë seancës mjekë dhe të afërm të të arrestuarve protestuan para gjykatës.
Mjekët dhe drejtues të Spitalit të Shkodrës të arrestuar dy ditë më parë nën akuzën e shpërdorimit të detyrës me një dëm rreth 34 milion lekë, u liruan nga Gjykata e Shkallës së Parë në Shkodër.
Ish-drejtori Përparim Çela është liruar me garanci pasurore prej 500 mijë lekësh, po ashtu me garanci pasurore prej 300 mijë lekësh u la e lirë farmacistja Karmen Kaçulini, ndërsa Amanda Matlija dhe Juliana Zhuri u lanë të lira me garancinë pasurore prej 200 mijë lekësh. Për infermierin Renato Kepi është lënë masa “detyrim paraqitje”. Për mjekun Luan Dragusha dhe infermieren Albana Mehmetaj u revokua masa e sigurisë dhe u lanë të lirë.
Në sallën e gjyqit prokuroria e përfaqësuar nga Blerta Hamza ka kërkuar masë shtërnguese ndaj këtyre 7 shtetasve por pala mbrojtëse ka kundërshtuar duke thënë se mjekët dhe infermierët nuk kanë asnjë lidhje me atë çfarë akuzoheshin. Avokati i mjekut Dragusha i tha BIRN se prokuroria nuk kishte asnjë provë për akuzën e ngritur. “Si mbrojtje kam kërkuar së paku një prove që të vërtretonte përfshirjen e mjekut Dragusha në blerjen e stendave për ndërhyrjet në zemër. Prokuroria nuk kishte asnjë provë”, tha avokati Bujar Hoti.
Lexo më shumë:
- Spitali i rrënuar i Peqinit, kosto tetë herë më të larta për pacient se QSUT
- Koncesioni i Dializës realizon 380 mijë euro fitime ende pa nisur mirë punën
- Koncesioni i sterilizimit u kushton 3.2 milionë USD shqiptarëve në 10 muajt e parë
- Koncesioni i hemodializës i transferohet kompanisë guaskë në Amsterdam
Hetimet në Shkodër nisën pas një auditi të Kontrollit të Lartë të Shtetit, i cili gjeti se Spitali i Shkodrës kishte blerë në vitin 2016, 400 stenda (katetër, koronare dhe sete kirurgjikale të kardikirurgjisë) me vlerë rreth 11 milion lekë, ndërkohë që aty ishin bërë vetëm 3 operacione. KLSH po ashtu gjeti se megjithëse nuk kishte përdorur sasinë prej 397 stendash në vitin 2017 spitali i Shkodrës kishte bërë kërkesë dhe më pas edhe kontrata për një sasi të dytë prej 700 stendash. “Duke mos marrë parasysh gjendjen e stokut, afatin e skadencës, kapacitetin e spitalit, ndërhyrjet e planifikuara për atë vit”, thuhet në akuzën e ngritur nga prokuroria.
Por mbrojtja e të akuzuarve pretendoi se ndërhyrjet ishin kryer dhe se stendat ishin blerë sipas parashikimeve dhe me miratimin e Ministrisë së Shëndetësisë. “Ministria e Shëndetësisë planifikon ndërhyrjet sipas kërkesës së spitalit dhe ky dikaster ka planifikuar tre të tilla, dy të mbuluara nga sigurimi shëndetësor”, thanë mbrojtësit e të akuzuarve.
Sipas mbrojtjes, ndryshe nga pretendimi i akuzës për blerje jashtë nevojave, në spital ishin bërë rreth 250 ndërhyrje për të cilat kërkoheshin 1-5 stenda për secilën.
Gjatë seancës së masës së sigurisë mjekë dhe personel i spitalit kanë qëndruar para gjykatës. Po ashtu edhe pacientë të mjekëve kanë dalë në krah të tyre.
Bashkëshortja e ish-drejtori Çela, Marjeta Karanxha pretendoi se e gjitha kjo (arrestimi) “është i stisur dhe gatuar nga mendje të liga që kërkojnë të hedhin helmin e tyre”. Të afërm të mjekut Dragusha, i cili u la i lirë, dhe kolegë të tij thanë se në spital ishin bërë ndërhyrje dhe ishin shpëtuar 400 jetë në dy vjet. Ata thonë se mjeku është kthyer vullnetarisht nga SHBA, duke mundësuar hapjen e pavionit të koronarografisë në Shkodër dhe kryer një sërë operacionesh. Mjekët edhe më herët i lidhën akuzat me konkurencën.
