Gjykata e Fierit miratoi kërkesën e prokurorisë për të sekuestruar kompleksin “Pelikan”, një apartament dhe një makine. Pronat e sekuestruara zotërohen nga Arben Gropa (Vangjel Ziaj) i dënuar me 32 vjet e 6 muaj burg në Itali për pjesëmarrje në organizatë kriminale, trafikim narkotikësh dhe shfrytëzim prostitucioni. Katër vjet më parë gjykata miratoi ekstradimin e Gropës drejt Italisë, policia thotë se ai po vuan dënimin në shtetin fqinj.
Katër vjet pas vendimit të gjykatës për ekstradimin e Arben Gropës (ndryshe Vangjel Ziaj) në Itali ku ai ishte dënuar me 32 vjet e 6 muaj burg për pjesëmarrje në organizatë kriminale, trafikim narkotikësh dhe shfrytëzim prostitucioni, prokuroria i ka kërkuar gjykatës sekuestro preventive të pronave të tij.
Në një njoftim për shtyp të Policisë së Shtetit thuhet se 50-vjeçarit i njohur edhe si Vangjel Ziaj, iu sekuestruan në një operacion të kryer nga task-forca “Forca e Ligjit” “rreth një million euro pasuri”, përfshi një kompleks shërbimesh, një apartament dhe një makinë.
Policia thotë se Gropa po vuan dënimin e mbetur prej 29 vitesh burg në Itali. Ekstradimi i tij kaloi në një sërë peripecish, ngjashëm me disa raste të tjera në Fier. Pasi u arrestua në janar të vitit 2014 Gropa, i cili u la nga gjykata me masë sigurie arresti në shtëpi, u arratis në verë të atij viti. Vendimi për ekstradimin e tij drejt Itali mbeti pezull, edhe pse ishte konfirmuar edhe nga Gjykata Kushtetuese.
Lexo edhe:
Bosët e krimit në Shqipëri i shpëtojnë ekstradimit
Ndërkohë këtë të martë policia e Fierit njoftoi nisjen e “procedimit penal të regjistruar për veprën penale “pastrimi i produkteve të veprës penale ose veprimtarisë kriminale” parashikuar nga Neni 287 i Kodit Penal për hetime të pasurisë së shtetasit Vangjel Ziaj (Arben Gropa)”.
Në njoftim thuhet se “është zbatuar vendimi i Gjykatës së Rrethit Gjyqësor Fier për sekuestro preventive” në lidhje me pasuritë e Arben Gropës i cili sipas njoftimit është duke vuajtur në Itali dënimin e mbetur.
Pasuritë e sekuestruara të cilat sipas policisë kapin vlerën e 1 milion eurove janë: “kompleksi shërbimeve “Pelikani” i ndodhur në lagjen “Sheq i Madh” Fier, një apartament me sipërfaqe 70 metra katror në lagjen “Kryengritja e Fierit” dhe një automjet i markës tip “Benz’”. Sipas policisë, do të verifikohen edhe pasuritë e personave që dyshohet të kenë lidhje me 50-vjeçarin Gropa.
Pas arrestimit të tij në vitin 2014, Arben Gropa, kërkoi atëherë konvertimin e dënimit dhe vuajtjen e tij në Shqipëri, por kërkesa u rrëzua.
