Leku shqiptar u shkëmbye në kuotën 125.91 lekë për euro të martën, niveli më i ulët që nga 28 gushti.
Leku shqiptar u forcua me 0.25% kundrejt euros të martën sipas të dhënave të kursit mesatar fiks të Bankës së Shqipërisë, duke vijuar një tendencë dyjavore forcimi gradual pavarësisht se shtatori është muaj ku zakonisht leku dobësohet ndërsa Banka e Shqipërisë vijon ndërhyrjen e saj të jashtëzakonshme për parandalimin e forcimit të mëtejshëm të monedhës kombëtare.
Leku njohu një rënie të lehtë nga fundi i gushtit kur ishte në kuotën 125.8 lekë për euro deri në mes të shtatorit në kuotën maksimale 126.7 lekë. Por pas mesit të shtatorit tendenca ka qenë një forcim i vazhdueshëm i lekut deri ditën e martë në kuotën 125.9 lekë për euro.
Forcimi i ri i lekut në kushtet kur Banka e Shqipërisë vijon të blejë euro në treg flet njëkohësisht për praninë e tepërt të euros si dhe për mungesën e lekut. Arsyet mbi praninë e tepërt të euros në tregun valutor, në përmasa të tilla sa edhe blerjet e jashtëzakonshme të BSH nuk arrijnë ta pakësojnë, aludohet se lidhen me aktivitetin kriminal në shkallë të gjerë nga krimi i organizuar shqiptar në vendet anëtare të Bashkimit Europian. Nga ana tjetër, prania e paktë e euros në treg lidhet si me sjelljen rakitike të financave publike, ashtu edhe me gjendjen e vështirë ekonomike të përgjithshme, e cila është shoqëruar me mungesë kreditimi të ekonomisë pavarësisht interesave shumë të ulëta.
