Mijëra bullgarë në të gjithë vendin vajtuan vrasjen brutale të gazetares Victoria Marinova duke ndezur qirinj të hënën në mbrëmje.
Mijëra njerëz në Bullgari organizuan përkujtimore të hënën në mbrëmje ku shumica u mblodh në Ruse, qyteti i lindjes i Victoria Marinova, ku ajo u sulmua brutalisht dhe u vra ditën e shtunë.
Në pjesën e parë të vigjiljes para kishës St. Nedelya të Sofjes, grupe të vegjël njerëzish u mblodhën përreth një faltoreje të improvizuar për të ndezur qirinj pranë një portreti të Marinovës.
“Ajo u vra në mënyrë shumë brutale, pavarësisht nëse kjo ndodhi apo jo për shkak të punës së saj,” tha për BIRN Petar Stoykov, një i ri që merrte pjesë në vigjilje.
Shumë gazetarë nga media me bazë në Sofje iu bashkuan gjithashtu turmave të mëdha të njerëzve që dolën në rrugë të protestonin.
Vrasja e Marinovës u dënua ndërkombëtarisht. Sekretari i Përgjithshëm i Kombeve të Bashkuara Antonio Guterres i bëri thirrje qeverive të gjejnë përgjegjësit për krimet kundër gazetarëve, siç ishte rasti i “vrasjes tmerruese dhe përdhunimit” të prezantueses televizive bullgare, e cila punonte për kanalin e vogël lokal TVN.
Ndërkohë shumë pjesëmarrës në manifestimin e heshur në Sofje protestuan kundër korrupsionit para Pallatit të Drejtësisë.
Ata u zotuan se do të vazhdojnë të protestojnë çdo ditë derisa autoritetet të gjejnë vrasësin e gazetares.
“Çdo gjë që do të gjejnë autoritet, do të vihet në diskutim. Njerëzit nuk kanë besim se ata do të bëjnë një punë të arsyeshme. Ata thjesht s’kanë më besim,” tha për BIRN Tanya Kosotva, e cila mori pjesë në përkujtimore dhe në protestë.
Autoritetet nuk kanë lajmëruar progres të rëndësishëm në hetimin e vrasjes, por prokuroria tha se po ngrinte shtatë milionë euro të aseteve të GP Group.
GP Group, një kompani infrastrukture, ishte subjekt i programit të fundit që Marinova realizoi në shtator, në të cilin anëtarë të kolektivit të gazetarisë investigative Bivol dhe Rise Project u intervistuan për punën e tyre në zbulimin e mashtrimeve të dyshuara me fondet europiane që kanë lidhje me kompaninë.
Tridhjetë vjeçarja Victoria Marinova, prezantuese dhe administratore e televizionit rajonal TVN, u gjet e vrarë pranë bregut të lumit Danub në qytetin jugor bullgar Ruse.
Autoritetet raportuan se viktima ishte përdhunuar, rrahur dhe më pas ishte mbytur. Ajo u gjet nga një kalimtar të shtunën pasdite dhe trupi i saj u identifikua nga familja po atë mbrëmje.
