Policia serbe arrestoi katër persona nën dyshimet se sulmuan dy të rinj shqiptarë të Kosovës në qytetin verior serb të Novi Sadit.
Ministri i brendshëm serb Nebojsa Stefanoviç tha të martën se autoritetet kanë arrestuar katër vetë, të cilët dyshohet se sulmuan dy shqiptarë të Kosovës në Novi Sad në fundjavë.
“Pas një hetimi intensiv, policia identifikoi të gjithë sulmuesit që sulmuan dy të rinjtë dhe arrestoi katër persona të dyshuar për këtë krim,” tha Stefanoviç për gazetarët, njoftoi gazeta Blic.
“Rrobat që të dyshuarit kishin veshur të dielën në mëngjes gjatë sulmit u gjetën gjithashtu, gjë që është e rëndësishme për vazhdimin e hetimit,” shtoi ai.
Dy shqiptarët 19-vjeçarë u sulmuan herët në mëngjesin e së dielës në Novi Sad. Njëri prej tyre ende ndodhet në gjendje të rëndë në një spital lokal.
Mediat serbe raportuan se incidenti ishte i motivuar etnikisht dhe se shqiptarët u sulmuan për shkak se po flisnin në gjuhën e tyre, edhe pse Stefanoviç shprehu dyshime për këtë.
“Edhe pse hetimi, deri më tani, duke përfshirë marrjet në pyetje të të dyshuarve, por edhe të të lënduarve, tregon se ky incident nuk është nxitur në baza kombëtare (etnike), policia do të shqyrtojë të gjitha akuzat në detaje dhe do të sigurojë të vërtetën e plotë,” tha ai.
Incidenti u dënua gjerësisht nga zyrtarët serbë dhe kosovarë dhe nga OJQ-të e të drejtave të njeriut.