Presidenti përzgjodhi anëtaren e vetuar të Gjykatës Kushtetuese, Vitore Tusha për drejtimin e Kontrollit të Lartë të Shtetit. Kandidatura e Tushës iu propozua për votim Kuvendit.
Mes një liste prej 34 kandidatësh, presidenti Ilir Meta përzgjodhi Vitore Tushën si kandidate për kryetare të Kontrollit të Lartë të Shtetit. Presidenca lajmëroi të hënën përmes një njoftimi për shtyp se dekreti me emrin e Tushës do t’i propozohej për votim Kuvendit të Shqipërisë.
“Presidenti pas realizimit të një procesi transparent dhe objektiv, ka arritur në konkluzionin se, Doktore e Shkencave Juridike znj. Vitore Tusha plotëson kushtet dhe kriteret ligjore, si dhe është kandidatura më e përshtatshme për t’u zgjedhur në këtë pozicion kushtetues…,” thuhet në njoftimin për shtyp të Presidencës.
Kontributi në fushën e jurispudencës, atë të drejtësisë si dhe angazhimi akademik janë argumentet e përdorura nga Presidenti i Republikës në favor të përzgjedhjes së kandidaturës së Tushës. Kalimi me sukses i procesit të vetingut, sipas njoftimit “ka krijuar bindjen se kandidatura e saj është e denjë për t’u zgjedhur si kryetar i Kontrollit të Lartë të Shtetit”.
Vitore Tusha është anëtare e Gjykatës Kushtetuese, ndonëse mandati i saj në këtë funksion ka mbaruar që në mars të vitit 2017. Ajo mban gradën “Doktore” e Shkencave në Drejtësi si dhe ka kryer më parë detyrën e gjyqtares së rrethit, gjyqtares së Kasacionit si dhe profesionin e avokates.
Tusha propozohet që të zëvendësojë në krye të Kontrollit të Lartë të Shtetit Bujar Leskajn, mandati i së cilit mbaroi në fillim të tetorit. Në garën brenda Presidencës, Tusha doli në krye të një liste të gjatë kandidatësh, përfshirë dy ish-ministrat e Financave, Anastas Angjeli dhe Shkëlqim Cani, ish-kreun e SHISH, Bahri Shaqiri apo ish-kryetaren e KQZ-së, Lefterie Luzi.
Dekreti për kryetarin e KLSH-së pritet të kthehet në një test për marrëdhëniet e trazuara të Presidentit me mazhorancën, pas refuzimit të Metës për të dekretuar Sandër Lleshin në postin e Ministrit të Brendshëm. Sipas Kushtetutës dhe ligjit organik të Kontrollit të Lartë të Shtetit, kryetari i këtij institucioni propozohet nga Presidenti dhe zgjidhet nga Kuvendi; ç’ka kërkon votat e mazhorancës për emërimin e Vitore Tushës.