Fondi Monetar Ndërkombëtar i rekomandoi qeverisë në raportin e fundit të rrisë si cilësinë, ashtu edhe sasinë e shpenzimeve në arsim dhe shëndetësi ndërsa qeveria duket se i tha fondit se beson se fondet aktuale mjaftojnë.
Fondi Monetar Ndërkombëtar sugjeroi në raportin e saj të fundit se Shqipëria ka nevojë të rrisë shpenzimet për sektorin e arsimit dhe të shëndetësisë si domosdoshmëri për rritje ekonomike, por qeveria shqiptare beson se fondet aktuale janë të mjaftueshme.
FMN publikoi raportin e saj vjetor për Shqipërinë, ku mes të tjerash raporton për opinionin e ndryshëm që nga stafi i saj në krahasim me opinionin e qeverisë mbi këtë çështje.
“Nevoja për të përmirësuar arsimin, kujdesin shëndetësor dhe infrastrukturën drejt standardeve europiane kërkon njëkohësisht rritjen e cilësisë së shpenzimeve ashtu edhe nivelin e shpenzimeve,” shkruan FMN në raportin e publikuar të hënën.
“Në veçanti, shpenzimet në arsim mbeten të ulëta ndërsa deficiti në aftësi përbën një pengesë serioze për rritjen ekonomike dhe rritjen e produktivitetit,” shkruhet më tej në raport.
Raporti shkruan edhe për mënyrën se si qeveria shqiptare e sheh këtë çështje, e cila është bërë temë e debatit publik që nga dhjetori i kaluar falë protestave masive të studentëve.
“Autoritetet [shqiptare] përsëritën [se kanë] konsensus politik në mbajtjen e një qeverie të vogël dhe barrë të ulët fiskale,” shkruhet në raport. “Ata pranojnë nevojën për të përforcuar cilësinë e arsimimit dhe kujdesin shëndetësor dhe ishin të mendimit se kjo mund të arrihet me buxhetin aktual përmes optimizimit dhe eficencës më të lartë [të shpenzimeve]”, vijon më tej raporti.
Por ndryshe nga qeveria, Fondi beson se këto sektorë dhe në veçanti, arsimi, nuk kanë nevojë vetëm për më shumë eficencë në shpenzimet aktuale, por edhe për fonde shtesë.
Fondi e sheh çështjen e arsimimit si pjesë e problemeve më të gjera ekonomike të vendit dhe mendon se arsimi më i mirë sjell përfitime më të larta ekonomike.
“Analizat e stafit sugjerojnë se rritja e eksporteve mund të jetë më e madhe nga zgjerimi Zinxhirit Botëror të Vlerës, gjë që kërkon përmirësim në arsim, institucione, cilësi të infrastrukturës dhe thellësisë së marrëveshjeve tregtare,” shkruan raporti.
Aktualisht eksportet e Shqipërisë janë të përqendruara në masën dërrmuese në atë që FMN e quan “pjesa e ulët e zinxhirit të vlerës” dhe këtu Shqipëria është në pozicionin më të dobët në Ballkanin Perëndimor. Eksportet shqiptare kanë vlerë të ulët të shtuar, të tilla si manifaktura e veshjeve apo këpucëve, mineralet e papërpunuara dhe turizmi.
