Anëtari i Gjykatës së Lartë dorëzoi një raport të detajuar mbi udhëtimet e tij jashtë shtetit, të dhëna të cilat pritet të reflektohen në analizën e tij financiare.
Në seancën përballë Kolegjit të Posaçëm të Apelimit të martën, anëtari i Gjykatës së Lartë, Edmond Islamaj paraqiti një raport të detajuar për udhëtimet e tij jashtë Shqipërisë si dhe dorëzoi tre dokumente; dy për udhëtime pune nga KLD dhe një udhëtim shërbimi të bashkëshortes.
Por seanca u shty për herë të tetë, pasi Kolegji vendosi të administrojë provat e reja dhe të shtyjë seancën. Verifikimi i udhëtimeve jashtë shtetit të gjyqtarit Islamaj bëhet për shkak të analizës financiare mbi burimet e pasurisë së tij. Në seancë u tha se deri në seancën e radhës, ekspertët e KPA do të përfshijnë të dhënat e reja në analizën financiare.
Në seancën e 22 janarit, Komisioneri Publik Florian Ballhysa pohoi se do të shprehej pasi subjekti të ndante udhëtimet private nga ato zyrtare në lidhje me listën e marrë nga sistemi TIMS dhe ndikimin e saj në analizën financiare të Islamajt.
Islamaj ka një karrierë të gjatë në gjyqësorin shqiptar dhe para se të emërohej në Gjykatën e Lartë, ka mbajtur poste të ndryshme, përfshirë gjykatës i Shkallës së Parë, kryetar gjykate, kryeinspektor në Këshillin e Lartë të Drejtësisë, anëtar i Këshillit të Lartë të Drejtësisë, si dhe gjykatës Apeli.
Ai iu nënshtrua procesit të rivlerësimit për shkak të funksionit dhe hetimi administrativ i udhëhequr nga Genta Tafa Bungo, arriti në përfundimin se i përmbushte të tre kriteret e vetingut, përfshirë integritetin e figurës, profesionalizmin dhe kontrollin e pasurisë. Megjithatë, vendimi i KPK-së për sa i përket kontrollit të pasurisë u kontestua nga Komisioneri Publik, i cili çmoi se “procesi i hetimit i Komisionit për kriterin e vlerësimit të pasurisë nuk është i plotë, ka mangësi dhe për rrjedhojë në gjendjen që janë aktet nuk mund të konkludohet se subjekti i rivlerësimit ka arritur një nivel të besueshëm në vlerësimin e pasurisë së tij.” Seanca e radhës u caktua të zhvillohej më 12 shkurt, ora 9.00.
