Mosmarrëveshjet midis partnerëve të koalicionit të qeverisë së Kosovës mbi taksën për mallrat nga Serbia dhe Bosnja vënë në rrezik mbijetesën e qeverisë, ka paralajmëruar kryetari i kuvendit Kadri Veseli.
Mosmarrëveshjet midis zyrtarëve të Kosovës mbi heqjen e taksës së importit prej 100 për qind për mallrat nga Serbia dhe Bosnja dhe Hercegovina kanë shkaktuar paralajmërime të reja se qeveria mund të bjerë dhe mund të detyrohet të mbajë zgjedhje të menjëhershme.
Kryeministri Ramush Haradinaj nuk tërhiqet nga qëndrimi i tij se taksa do të hiqet vetëm kur Serbia të njohë Kosovën.
Por kreu i partisë partnere të koalicionit qeverisës, Partia Demokratike e Kosovës, PDK, Kadri Veseli, ka propozuar pezullimin e taksës për 120 ditë dhe ka paralajmëruar se qeveria mund të rrëzohet për shkak të këtij problemi.
Veseli, i cili është gjithashtu kryetar i parlamentit, tha për RTV Dukagjini të martën se ndërkohë që marrëdhënia e tij me kryeministrin Haradinaj mbetej e përzemërt, “kryeministri ka filluar të bëhet shumë individualist”.
Veseli propozoi pezullimin e taksës pas takimit me ambasadorin e SHBA-së në Kosovë, Philip Kosnett, të hënën.
Shtetet e Bashkuara i kanë bërë thirrje Kosovës të marrë në konsideratë një “pezullim të menjëhershëm” të taksës, por Haradinaj nuk tregon shenja se do ta marrë në konsideratë thirrjen.
Veseli tha për stacionin televiziv se qeveria do të binte nëse marrëdhëniet me aleatin kryesor të vendit, Shtetet e Bashkuara, ndërpriten për shkak të problemi të taksës së importeve.
“Ditën që partneriteti me Shtetet e Bashkuara merr fund, koalicioni bie dhe Kadri Veseli largohet nga kryesia e kuvendit,” tha Veseli.
Më herët të martën, Haradinaj tha se edhe nëse do të thirren zgjedhjet e parakohshme, taksa do të mbetej ende në fuqi deri në verë.
“Nëse thirren zgjedhjet, do të kalojnë 45 ditë derisa ato të mbahen dhe do të nevojiten edhe 30 ditë të tjera derisa të formohet Asambleja e re. Bëhuni gati të hyni në verë me taksën ende në fuqi,” tha Haradinaj në një konferencë për shtyp.
Duke komentuar deklaratat në media se kjo mund të jetë java e fundit që Haradinaj drejton qeverinë, një deputet nga partia e Haradinajt, AAK, Rasim Selmanaj, tha për gazetën Zëri të mërkurën se partia e tij ishte gati për zgjedhje – “dhe nuk do të tërhiqej nga vendimet e drejta”.
Shumica e qeverisë është shumë e pakët, me të dyja palët që ndajnë një ekuilibër pothuajse të barabartë të pushtetit. Opozita mund të pengojë lehtësisht nismat parlamentare, kryesisht për shkak se qeveria ka humbur mbështetjen e partisë kryesore serbe, Lista Serbe, pasi qeveria vendosi taksat e larta mbi mallrat nga Serbia.
BE-ja i ka kërkuar gjithashtu Kosovës që të heqë taksën, duke thënë se ajo është në kundërshtim me anëtarësimin e Kosovës në grupin rajonal të tregtisë së lirë, CEFTA.
Kosova vendosi dhe më pas rriti taksën e importit pasi nuk arriti të anëtarësohej dot në Interpol, për të cilën ajo ka fajësuar lobimin serb.
