Gjykata shtyn vendimin mbi ankesën e ish-ministrit të Brendshëm, Saimir Tahiri për zgjatjen e afatit të hetimeve, duke kërkuar më parë aktet e dosjes nga prokuroria. Tahiri: Drejtësia e vonuar nuk është më drejtësi.
Seanca gjyqësore për ankimin e ish-ministrit të Brendshëm, Saimir Tahiri ndaj zgjatjes së hetimeve nisi me debate mes tij dhe prokurorit të Krimeve të Rënda, Vladimir Mara, i cili kërkoi seancë me dyer të mbyllura për mbrojtjen e “sekretit hetimor”.
“Në 1 vit e 9 muaj hetim nuk di ç’ka mbetur e fshehur në këtë proces se lajmet janë trafikuar nga prokuroria në media, i kam me mesazhe. Çfarë sekreti hetimor ka këtu?” kundërshtoi Tahiri.
Pavarësisht qëndrimit të ish-ministrit, gjyqtarja Liljana Baku vendosi të miratojë kërkesën e prokurorit për zhvillimin e seancës pa praninë e mediave. Megjithatë, BIRN mësoi se gjykata nuk arriti të marrë një vendim lidhur me kundërshtimin e zgjatjes së hetimeve nga ana e Tahirit. Gjyqtarja Baku u kërkoi prokurorëve që në seancën e radhës, e planifikuar për datën 11 shkurt, të vënë në dispozicion aktet e dosjes prej nga do të vlerësohet vendimarrja e organit të akuzës për shtyrjen e hetimeve.
Pas daljes nga ambjentet e Gjykatës së Krimeve të Rënda, ish-ministri Tahiri akuzoi prokurorinë se ka kapërcyer çdo limit të kohës për kryerjen e hetimeve.
“Hetimet janë zgjatur pesë herë, ka kaluar çdo afat i arsyeshëm, çështja duhet të marrë zgjidhje në një mënyrë apo një tjetër. Drejtësia e vonuar nuk është më drejtësi, e nëse kjo ndodh me mua, imagjinoni se çfarë ndodh me të tjerët, që përplasen para gjykatave,” tha Tahiri për mediat.
Ish-ministri i Brendshëm nuk është i vetmi që ka kundërshtuar zgjatjen e hetimeve nga ana e Prokurorisë. Ish-shefi i policisë së Vlorës, Jaeld Çela, i akuzuar për përfshirje në trafikun ndërkombëtar të lëndëve narkotike është ankuar gjithashtu nga arratia për zgjatjen e hetimeve.
Si Tahiri ashtu edhe Çela akuzohen nga Prokuroria e Krimeve të Rënda për implikim në trafikun e narkotikëve, e kryer nga një organizatë e krimit të organizuar e drejtuar nga vëllezërit Habilaj.
Tahiri i ka mohuar akuzat, ndërkohë që ish-kreu i Policisë së Vlorës ndodhet prej një viti e gjysmë në arrati së bashku me dy drejtues të tjerë të policisë lokale.
Anëtarët e kësaj organizate u ndaluan në tetor të vitit 2017 nga autoritetet italiane, teksa po tentonin të trafikonin një sasi të konsiderueshme lënde narkotike nga Shqipëria drejt vendit fqinj.
Po në vjeshtën e vitit 2017, në Babicë të Vlorës, në magazinën e Armando Koçerrit u gjetën dhe sekuestruan rreth 4 ton cannabis sativa, episod ky që u shoqërua me procedim penal edhe në Shqipëri.
Çështja penale ndaj ish-ministrit Tahiri filloi në tetor 2017, pas publikimit të disa përgjimeve të anëtarëve të grupit “Habilaj”, të cilët përmendnin emrin e Tahirit dhe aludonin se i kishin blerë dhurata. Prokuroria e Krimeve të Rënda e ka shtyrë pesë herë afatin e hetimeve, duke pretenduar se është ende në pritje të marrjes së letër-porosive.
Tahiri ishte akuzuar edhe më herët për lidhje me vëllezërit Habilaj, me të cilët ka edhe një lidhje farefisnore dhe u kishte shitur një makinë, të cilën më pas e kishte ripërdorur, por një hetim mbi këtë u mbyll pa rezultat.