Frika europiane e ekspansionizmit turk në Ballkanin Perëndimor në realitet ka pak baza, thotë një publikimin i ri nga Këshilli Europian për Marrëdhëniet me Jashtë.
Frika europiane për ndikimin e Turqisë në Ballkanin Perëndimor bazohet në një kuptim të ekzagjeruar të pushtetit dhe qëllimeve të Turqisë në rajon, thotë në një raport në Këshillin Europian për Marrëdhëniet me Jashtë, ECFR, Asli Aydintasbas.
“Turqia nuk është as alternativë dhe as aktori më i madh ekonomik në rajon. Ajo nuk kërkon të largojë Ballkanin Perëndimor nga BE-ja. As nuk e sheh veten si një kundërpeshë e Rusisë,” shkroi Aydintasbas në raportin “Nga mit në realitet: Si të kuptojmë rolin e Turqisë në Ballkanin Perëndimor” i publikuar më 13 mars.
Ndërsa Turqia kërkon mundësi në rajon, ajo në fakt dëshiron që Ballkani Perëndimor të hyjë në BE dhe në NATO, argumenton gjithashtu raporti.
Aktivitetet e politikës së jashtme turke, projektet sociale, kulturore dhe mediatike, si dhe investimet ekonomike, janë rritur të gjitha me shpejtësi në rajon në dekadën e fundit.
Eksportet turke në vendet e Ballkanit janë rritur me shpejtësi, sipas Dhomës së Eksportuesve Turq.
Presidenti turk Rexhep Tajip Erdogan ka kërkuar prej kohësh të forcojë lidhjet me ish-tokat osmane në Ballkan, duke e vënë Ankaranë në konkurrencë me Rusinë dhe BE-në në rajon.
Liderët europianë kanë shprehur shqetësime lidhur me atë që ata e quajnë ndikim zgjerues i Turqisë në Ballkan në disa raste.
Presidenti francez Emmanuel Macron vitin e kaluar i kërkoi Bashkimit Europian të promovojë ndikimin e tij në Ballkanin Perëndimor, duke paralajmëruar se përndryshe vendet në rajon do të kthehen nga Rusia ose Turqia.
Megjithatë, në raportin e tij Aydintasbas theksoi rëndësinë e ndarjes së realitetit të pushtetit të Turqisë në Ballkanin Perëndimor nga retorika e liderëve turq, e cila synohet kryesisht për konsum të brendshëm.
“Mos ngatërroni disa kurse gjuhe dhe ndërtesa të epokës osmane tek tuk me një vizion alternativ për rajonin. Perspektiva mbizotëruese për rajonin dhe rajonin është procesi i BE-së dhe nuk ka alternativë për këtë,” tha ai.
Raporti pohon se Ballkani Perëndimor nuk është një prioritet për politikën e jashtme turke, e cila përqendrohet më shumë në marrëdhëniet me Europën dhe zhvillimet në konfliktin sirian.
Në vend që të konkurrojnë me njëra-tjetrën, shprehet Aydintasbas, Europa dhe Turqia duhet të zhvillojnë një marrëdhënie më të ngushtë kur bëhet fjalë për Ballkanin Perëndimor.
