Persona të armatosur kanë qëlluar me mjete të forta një zyrtarë lokal dhe i kanë grabitur makinën të cilën më pas e kanë djegur.
Një automjet është grabitur dhe më pas i është vënë flaka nga persona ende të paidentifikuar, ndërsa pronari i makinës një zyrtarë i Bordit të Kullimit Lezhë është goditur me mjete të forta.
Policia njoftoi se ngjarja ka ndodhur rreth orës 20:00 të mbrëmjes së të enjtes në hyrje të rrugës së fshatit Kakarriq në Lezhë vetëm pak metra nga superstrada Lezhë-Shkodër. “Automjeti tip mercedez me targa “AA377KH” në pronësi të shtetasit Nikolin Kola banues në Balldre të Lezhës, punonjës i Bordit të Kullimit për Veriun është djegur plotësisht”, njoftoi policia.
Ndërkohë nga hetimet rezultoi se mjeti i ishte marrë me forcë pronarit të tij. Kola ka dëshmuar se ai ishte duke udhëtuar, por është kërcënuar me armë nga dy persona të cilët e kanë nxjerrë me forcë nga makina e kanë qëlluar me sende të forta dhe janë larguar duke marrë makinën.
Pas kësaj drejtuesi i mjetit është dërguar në spital për të marrë ndihmë mjekësore, ndërsa makina ështëgjetur e djegur dy kilometra larg vendit të ngjarjes. I dëmtuari i ka thënë policisë se nuk i ka njohur agresorët.