Kryebashkiaku i Malësisë së Madhe, Tonin Marinaj zotëron pasuri të patundshme me vlerë 154.3 milionë lekë, ndërkohë që kompania e themeluar prej tij u dhurua në vitin 2016. Tonin Marinaj u zgjodh kryetar i Bashkisë së Malësisë së Madhe në zgjedhjet lokale të vitit 2015, si përfaqësues i Partisë Socialiste dhe i koalicionit “Aleanca për Shqipërinë Europiane”. Ai u bë pjesë e politikës lokale pas aktivitetit të tij si biznesmen prej më shumë se 20 vitesh.
Tonin Marinaj e ka nisur karrierën e tij në vitin 1988 nga Ndërmarrja e Shitblerjes në Shkodër, ndërsa pas ndryshimit të sistemit themeloi kompaninë e tij në fushën e tregtisë dhe ndërtimit, Marinaj M sh.p.k.
Në vitin 2001, Marinaj u zgjodh kryetar i Partisë Demokristiane për Malësinë e Madhe, pozicion të cilin e mbajti deri në vitin 2008. Ai iu bashkua Partisë Socialiste në vitin 2010 dhe u kandidua prej saj në zgjedhjet lokale të vitit 2015, të cilat i fitoi me 54.57% të votave. Z. Marinaj është konfirmuar si kandidat për një mandat të dytë në zgjedhjet e 30 qershorit 2019.
Ky raport është prodhuar nga BIRN pas administrimit të deklaratave të pasurisë së kryetarit të Bashkisë së Malësisë së Madhe nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryebashkiakëve të vendit në prag të zgjedhjeve vendore të 30 qershorit.
Skeda grafike e mëposhtme paraqet pasurinë familjare të deklaruar nga kryebashkiaku i Malësisë së Madhe nga viti 2015 deri në fund të vitit 2017. [Kliko për skedën në PDF].
Para fillimit të detyrës si kryebashkiak në vitin 2015, Tonin Marinaj deklaronte pasuri familjare me vlerë 183.5 milionë lekë. Pasuria e tij përbëhej nga apartamente, sipërfaqe të pandara ndërtimi dhe troje të ndodhura në Tiranë dhe në qarkun e Shkodrës me burim aktivitetin e tij të biznesit ndër vite. Ai deklaronte gjithashtu pjesmarrjen e bashkëshortes në kapitalin e kompanisë Marina/M në vlerën 25.8 milionë lekë si dhe likujditete bankare, kursime në cash si dhe një automjet me vlerë 1.3 milionë lekë.
Në fund të vitit 2017, pasuria familjare e kryebashkiakut të Malësisë së Madhe kap vlerën e 157.7 milionë lekëve. Ajo përbëhet nga 154.3 milionë lekë pasuri të patundshme, 1.4 milionë lekë kursime në cash, automjeti me vlerë 1.3 milionë lekë si dhe likujditete bankare me vlerë rreth 632 mijë lekë.
Pakësimi i pasurisë lidhet me kompaninë Marina M, aksionet e së cilës janë falur nga bashkëshortja e Marinajt më 4 janar 2016. Sipas të dhënave në Qendrën Kombëtare të Biznesit, QKB, kompania i është dhuruar Ylli Sterkajt, i cili i ka ndryshuar më pas emrin nga “Marina M” në “Mastela” sh.p.k.
Përgjatë viteve 2015-2017, Marinaj ka siguruar të ardhura familjare në vlerën e 4 milionë lekëve. 65.7% e të ardhurave kanë si burim pagën e tij si kryebashkiak, ndërsa 20% janë siguruar nga puna e bashkëshortes. Të dhënat e deklaruara në ILDKPKI tregojnë gjithashtu se 14% e të ardhurave familjare deklarohen nga aktiviteti i bashkëshortes në kultivimin e sherebelës.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 3 deklarata të Z.Marinaj, të cilat rezultuan pa probleme.
Megjithatë, skanimi cilësor i deklaratave të pasurisë së kryetarit të bashkisë së Malësisë së Madhe zbuloi disa “flamuj të kuq”, të cilat lidhen kryesisht me burimin e pronave të patundshme si dhe me faljen e aksioneve në kompaninë e biznesit.
Më konkretisht, pasuritë e paluajtshme me vlerë totale të deklaruar 154.3 milionë lekë kanë si burim aktivitetin e biznesit të Z.Marinaj si dhe dhuratat nga babai. Pasuria e paluajtshme e dhuruar nga babai zë 11% të totalit.
Një tjetër “flamur i kuq” i identifikuar në këtë analizë është falja e 100% të aksioneve të kompanisë Marina M sh.p.k në vitin 2016. Sipas të dhënave në QKB, Marina M sh.p.k është regjistruar në vitin 1992 nga Tonin Marinaj, fillimisht me aktivitet në fushën e tregtisë dhe më pas edhe në atë të ndërtimeve.
Në mars të vitit 2008, Z.Marinaj ia ka kaluar aksionet bashkëshortes së tij, e cila dhuroi 100% të kuotave te Ylli Sterkaj në janar 2016. Në janar 2019, kompania e themeluar nga kryebashkiaku i Malësisë së Madhe ndryshoi emrin në “Mastela” sh.p.k.
Duke qenë se ky raport bazohet në të dhëna statistikore të analizuara nëpërmjet një databaze, ai nuk nxjerr përfundime mbi pasurinë e subjektit nëse ajo është e ligjshme ose jo, por mëton të informojë publikun mbi pasurinë e deklaruar të zyrtarit publik nëpërmjet një formati të thjeshtë dhe të kuptueshëm grafik.
Deklarata e pasurisë Para Fillimit të Detyrës
Deklarata e pasurisë për vitin 2015
Deklarata e pasurisë për vitin 2016
Deklarata e pasurisë për vitin 2017
Për më shumë dokumente vizitoni databazën tonë dokumente.reporter.al
