Policia njoftoi se ka goditur një grup të struktuar kriminal me qendër në qytetin e Fierit, që dyshohet se trafikonte ngarkesa me kanabis drejt Greqisë.
Policia e Shtetit njoftoi të premten arrestimin e 11 personave të dyshuar për përfshirje në trafik ndërkombëtar të lëndëve narkotike. Sipas njoftimit të policisë, 4 prej të dyshuarve u arrestuan në flagrancë ndërsa po transportonin drejt Greqisë 79 kilogramë kanabis, ndërsa shtatë të arrestuarit e tjerë dyshohet se kanë lidhje me veprën penale.
“Personat e mësipërm në bashkëpunim me njëri-tjetrin u kapën në flagrancë duke trafikuar në drejtim të Greqisë një ngarkesë prej rreth 79 kilogramë lëndë narkotike të llojit “Canabis Sattiva”, e cila ishte e fshehur në vende të krijuara posaçërisht në automjetin që drejtohej nga shtetasi G.L,” tha policia.
Të arrestuarit dyshohet se janë pjesë e një grupi më të madh kriminal në fushën e narkotikëve, i cili po hetohej që pas kapjes së një sasie tjetër kanabisi në pikën kufitare të Kapshticës në fillim të prillit. Sipas policisë, një 38-vjeçar nga Lushnja u arrestua më 5 prill 2019 ndërsa po transportonte 68 kilogramë kanabis drejt Greqisë me një automjet të tipit “Toyota”.
Gjatë operacionit të koduar më pas me emrin “Bistrica” janë sekuestruar përveç dy ngarkesave të kanabisit me peshë totale prej 145 kilogramësh edhe armë zjarri dhe armë gjahu pa leje si dhe municione. Policia ka sekuestruar gjithashtu 4 makina, vlera monetare si dhe 14 aparate celulare.
Të ndaluarit janë proceduar nga Prokuroria për Krime të Rënda për veprat penale “trafikim të lëndëve narkotikëve”, “grup i strukturuar kriminal”, në bashkëpunim.
