Kryetari i bashkisë së Selenicës, Përparim Shametaj ka kryer investime në blegtori dhe në ndërtimin e një lokali fast-food në vitet 2005 dhe 2015, pa pasur mundësi që t’i mbulojë me të ardhurat e deklaruara pranë ILDKPKI-së. Përparim Shametaj u zgjodh kryetar i bashkisë së Selenicës në vitin 2015, pasi kishte drejtuar për tre mandate komunën e Sevasterit. Ai përfaqëson Partinë Demokratike dhe fitoi 53.81% të votave në zgjedhjet vendore të vitit 2015.
Shametaj është diplomuar për Menaxhim-Turizëm në universitetin “Ismail Qemali” të Vlorës. Ai u përfshi në politikën lokale në vitin 2003, duke u zgjedhur kryetar i komunës së Sevasterit në qarkun e Vlorës. Z.Shametaj e drejtoi komunën deri në vitin 2013, ndërkohë që në vitin 2015 u kandidua nga Partia Demokratike dhe koalicioni “Aleanca Popullore për Punë dhe Dinjitet”. [Lexo CV-në e plotë]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve të bashkive të vendit në prag të zgjedhjeve lokale të 30 qershorit.
Skeda grafike e mëposhtme paraqet pasurinë familjare të deklaruar nga kryebashkiaku Shametaj nga viti 2003 deri në fund të vitit 2017.
Kryetari i bashkisë së Selenicës zotëronte 6 dynymë tokë me vlerë 4 milionë lekë në vitin 2003, kur deklaroi për herë të parë interesat e tij private pranë ILDKPKI-së.
Ndërsa në fund të vitit 2017, pasuria familjare e Shametajt kap vlerën e 14.2 milionë lekëve, duke shënuar një rritje bruto prej 3.6 herësh. Pjesa kryesore e pasurisë përbëhet nga pasuritë e paluajtshme me vlerë 11.6 milionë lekë. Ai deklaron gjithashtu asete të tjera me vlerë 2.3 milionë lekë, të cilat përfaqësojnë investimet në blegtori të familjes.
Të ardhurat familjare për periudhën deklaruese janë 15.6 milionë lekë. Të ardhurat kryesore në familjen Shametaj burojnë nga paga nga funksioni me më shumë se 49%, ndërkohë që zëri i dytë më i madh rrjedh nga aktiviteti në bregtori me gati 28%. Aktiviteti privat i bashkëshortes në menaxhimin e një fast-foodi ka siguruar rreth 20% të të ardhurave, ndërkohë që një vlerë e vogël deklarohet si fitim nga shitja e një makine.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 13 vite të deklarimit, nga të cilat dy deklarata rezultuan me probleme dhe 11 të tjerat pa probleme.
Deklaratat me probleme i përkasin diferencës negative mes të ardhurave të deklaruara dhe shpenzimeve në vitet 2005 dhe 2010. Në vitin 2005, Shametaj deklaron investim në blegtori në vlerën e 600 mijë lekëve, ndërkohë që nuk deklaron asnjë të ardhur familjare për këtë vit.
Ndërsa për vitin 2010, ai deklaron një investim prej 1.5 milionë lekësh për ndërtimin e fast-food-it në fshatin Sevaster, duke rezultuar me mungesë burimesh financiare në vlerën e 360 mijë lekëve.
Përveç kontrollit aritmetik/logjik, BIRN identifikoi në këtë analizë disa “flamuj të kuq”, të cilat ekspozojnë pasaktësitë apo probleme të tjera në deklarime.
Njëri prej “flamujve të kuq” lidhet me deklarimin me vonesë të pronësisë mbi një shtëpi banimi, tokë bujqësore në Farkë të Tiranës apo investimet në blegtori; të gjitha të bëra para vitit 2003, por të deklaruara pranë ILDKPKI-së në vitin 2004.
Ndërsa në vitin 2015, kryetari i bashkisë së Selenicës i ka marrë hua të vëllait 1 milion lekë për ndërtimin e një shtëpie të re, hua e cila mbetet e pashlyer deri në fund të vitit 2017. Një tjetër “flamur i kuq” i identifikuar nga BIRN lidhet me shitjen e një automjeti për 300 mijë lekë në vitin 2017, ndërkohë që ky automjet nuk rezulton të jetë deklaruar ndonjëherë nga subjekti.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë për vitin 2015
Deklarata e pasurisë për vitin 2016
Deklarata e pasurisë për vitin 2017
Për më shumë dokumente vizitoni databazën tonë dokumente.reporter.al