Pasuria e deklaruar e kryetares në largim të bashkisë Sarandë, Florjana Koka nuk pati luhatje gjatë viteve në krye të qytetit jugor.
Florjana Koka u zgjodh në vitin 2015 fituese në garën për kryetar bashkie në Sarandë si kandidate e Partisë Socialiste me 54.09 % të votave.
E lindur në Sarandë, Koka shkollën e mesme e ka kryer në qytetin e lindjes, ndërsa shkollën e lartë në Universitetin e Tiranës, dega gazetari. Përpara se të zgjidhje kryebashkiake, Koka ka punuar si Drejtoreshë e Burimeve Njerëzore në Bashkinë e Sarandës.
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit, në prag të zgjedhjeve lokale të 30 qershorit.
Skeda grafike e mëposhtme paraqet pasurinë e deklaruar nga kryetarja e bashkisë Sarandë nga viti 2015 deri në fund të vitit 2017. [Kliko për skedën në PDF]
Në vitin e parë të deklarimit – vitit 2015, kryetarja e bashkisë së Sarandës, Florjana Koka, kishte një pasuri familjare të barabartë 11.1 milionë lekë. Në fund të vitit 2017, kjo pasuri është zvogëluar më 4729 lekë. Pasuria familjare e subjektit në 31 dhjetor 2017, përbëhet nga 9.7 milionë lekë pasuri të paluajtshme, një makinë me vlerë 102 mijë lekë, 1.2 milionë likuiditete në cash dhe 91,762 lekë kursime në bankë.
Pasuria e paluajtshme ndahet në një apartament me sipërfaqe 126.5 m2 me vlerë 3.79 milionë lekë, një dyqan me sipërfaqe 56,10 m2 me dhe vlerë 1.68 milionë lekë, shtesë ndërtimi në një objekt 4 kate + lokal me vlerë 3 milionë lekë, dhe një shtesë ndërtimi në të njëjtën ndërtesë me vlerë 1.25 milionë lekë.
Gjatë periudhës deklaruese subjekti ka pasur të ardhura familjare me vlerë 5 milionë lekë, nga të cilat 45.71 % vijnë nga paga për shkak të funksionit dhe 48.87 % nga qiraja.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq' që identifikohen gjatë kontrollit. BIRN kreu kontrollin aritmetik/logjik për 2 vite deklarimi nga të cilat nuk rezultuan probleme.
Nga analiza cilësore deklaratave të pasurisë së subjektit, evidentohet fakti se në deklaratën Periodike/Vjetore 2016, nga subjekti Florjana Koka dhe bashkëshorti i saj, janë deklaruar dy pagesa të kryera ndaj shoqërisë “Petani Bailiff's Office shpk” me vlerë 105'961 lekë dhe 95,000 lekë, por nuk sqarohet natyra e këtij detyrimi.
Deklarata e pasurisë përpara fillimit të detyrës
Deklarata e pasurisë e vitit 2016
Deklarata e pasurisë e vitit 2017
Për më shumë dokumente vizitoni databazën tonë dokumente.reporter.al