Kryetari i Bashkisë së Përmetit, Niko Shupuli rezulton me diferencë negative në vitin 2008; kur kursimet e deklaruara më parë nuk mjaftojnë për blerjen e një apartamenti.Niko Shupuli u zgjodh kryetar i Bashkisë së Përmetit në zgjedhjet lokale të 2015-ës, si kandidat i Partisë Demokratike dhe Aleancës Popullore për Punë dhe Dinjitet. Ai fitoi me 68.16% të votave ndaj rivalit të tij të Partisë Socialiste.
Niko Shupuli është diplomuar për Inxhinieri Elektronike në Universitetin Politeknik të Tiranës. Ai ka kryer më pas edhe studime për Juridik në Universitetin e Tiranës si dhe për gjuhë greke në universitetin “Aristoteli” të Selanikut.
Niko Shupuli ka një përvojë të pasur në administratën lokale, fillimisht si jurist në Bashkinë e Gjirokastrës e më pas si kryetar i Komunës Petran në Përmet, të cilën e drejtoi prej dy mandatesh. [Lexo CV-në e plotë]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit në fund të mandatit të tyre 4-vjeçar.
Skeda grafike e mëposhtme paraqet pasurinë e deklaruar nga kryetari i Bashkisë së Përmetit nga viti 2007 deri në fund të vitit 2017. [Kliko për skedën në PDF]
Kryebashkiaku Niko Shupuli zotëronte pasuri familjare me vlerë 6.1 milionë lekë në vitin 2007; kur deklaroi për herë të parë interesat e tij private në ILDKPKI, në cilësinë e kryetarit të komunës Petran. Në fund të vitit 2017, pasuria familjare e kryebashkiakut Shupuli është 8.1 milionë lekë, duke shënuar një rritje mesatare vjetore prej 263 mijë lekësh.
Pasuritë e patundshme zënë pjesën kryesore të aseteve me vlerë 7.6 milionë lekë, ndërkohë që subjekti deklaron kursime në cash prej 683 mijë lekësh dhe likujditete në bankë prej 627 mijë lekësh.
Të ardhurat familjare për periudhën deklaruese janë 8.9 milionë lekë. Rreth 87% e të ardhurave burojnë nga paga për shkak të funksionit, ndërsa paga e bashkëshortes llogaritet në 7% të të ardhurave familjare. Z.Shupuli ka siguruar gjithashtu 4% të të ardhurave nga mësimdhënia si pedagog i jashtëm dhe një vlerë më e vogël buron nga interesat bankare.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 11 vite të deklarimit, nga të cilat njëra rezultoi me probleme.
Deklarata me diferencë negative i përket vitit 2008, kur Z.Shupuli deklaronte si shtesë pasurie një apartament me vlerë 4.6 milionë lekë dhe me burim kursimet e deklaruara më parë. Megjithatë, kursimet e deklaruara rezultojnë të pamjaftueshme për të mbuluar blerjen e apartamentit me një vlerë prej 904 mijë lekësh-pa llogaritur këtu shpenzimet e konsumit familjar.
Deklarata Para Fillimit të Detyrës
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata Para Fillimit të Detyrës 2015
Deklarata periodike/vjetore e vitit 2015
Deklarata e pasurisë së vitit 2016
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al