Pas vdekjes së një 40-vjeçari që ra nga lartësia e një ndërtimi në Golem, policia arrestoi përfaqësuesin e kompanisë dhe shpalli në kërkim administratorin dhe drejtuesen teknike.
Përfaqësuesi i një kompanie ndërtimi në kantierin e të cilës humbi jetën të martën një punëtor 40-vjeçar, u arrestua nga policia, ndërsa administratori dhe drejtuesja teknike u shpallën në kërkim. Në komunikatën për shtyp të lëshuar mëngjesin e të mërkurës Policia e Tiranës nuk bën me dije se në cilën kompani ndodhi aksidenti, ndërsa vë në dukje se viktima i identifikuar si D.H 40 vjeç ishte i pasiguruar.
Vdekja e D.H e çoi në 28 numrin e punëtorëve që kanë humbur jetën në punë gjatë këtij viti, sipas të dhënave zyrtare. Sektori i ndërtimit ka numrin më të madh të aksidenteve dhe bashkë me 40 vjeçarin 11 viktima vetëm gjatë 10 muajve të këtij viti. Një investigim i BIRN publikuar sëfundmi gjeti se numri i aksidenteve të rënda në sektorin e ndërtimit ishte në rritje, ndërsa shteti dështon të mbikqyrë dhe ndëshkojë kompanitë për mungesën e sigurisë, ndërsa ia lë fajin për aksidentet viktimave.
Në njoftim policia thotë se ngjarja ndodhi të martën në Golem, dhe se viktima u rrëzua nga lartësia dhe më pas ndërroi jetë në spital. Të mërkurën policia njoftoi arrestimin e M. K., 37 vjeç, banues në Durrës, që sipas saj është përfaqësues i firmës që kishte marrë përsipër kryerjen e punimeve në objektin e ndërtimit.
Policia thotë se kompania ka shkelur rregullat e mbrojtes në punë, pasi “nga verifikimet e kryera ka rezultuar se punëtori D. H. (i cili ra nga lartësia dhe më pas ndërroi jetë në spital) nuk ka qënë i siguruar dhe nuk ka patur kontratë pune me firmën e punimeve që shtetasi M. K. Përfaqësonte”.
Po ashtu policia njoftoi se ishin shpallur në kërkim policor administratori dhe drejtuesja teknike e firmës që kryente punimet, “shtetasit I. K. dhe E. S., pasi nuk kishin marrë masa për zbatimin e rregullave të mbrojtjes në punë”.
