Në vijim të retorikës së tij kundër mediave, kryeministri Edi Rama kërcënoi duke iu referuar Japonisë për “masa ekstreme për mediat private” gjatë gjendjes së jashtëzakonshme.
Ndërkohë që parlamenti ka në axhendë një paketë ligjesh të qeverisë të pagëzuar si “paketa antishpifje” që sipas një sërë organizatash ndërkombatare dhe Bashkimit Europian sjell cënim të lirisë së shprehjes, kryeministri Edi Rama ka ashpërsuar pas tërmetit të 26 nëntorit tonet ndaj medias.
Duke pretenduar se po përhapnin panik në një situatë të jashtëzakonshme, Rama kërcënoi sërish të hënën për marrje masash. “Gjatë periudhës së gjendjes së jashtëzakonshme të fatkeqësisë natyrore, Japonia ka masa ekstreme për mediat private, që mesa duket edhe në Japoninë e urtësisë së vjetër, paskan qenë taksirat mbi taksiratin e madh të tërmetit! Mos na detyroni të bëjmë atë që s’ua rrok imagjinata!”, shkroi ai në Facebook.
Në postimin “Apel i detyruar mediave”, Rama kërkoi që të ndaloheshin ato që ai i cilësoi “klithmat nëpër studiot tv”, ndërsa kërkoi që mediat të angazhoheshin në “qetësimin e shpirtrave të goditur më keq se banesat!”. Më herët kryeministri citoi një dijetar Islam për verifikimin e lajmit, ndërsa një pjesë e kohës televizive në takime dhe vizita ia ka kushtuar sulmit ndaj mediave.
Faqja online “Jeta osh qef” akuzoi qeverisë dhe AKEP se kishte bllokuar aksesimin e saj në faqen kryesore joqalbania.com, ndërsa publikuesit e saj hapën një domain të ri, joq-albania.com. Dy drejtues të faqes po ashtu u morën në pyetje nga policia dhe ndaj tyre u nis një procedim penal. Ndërkohë një 25-vjeçare u arrestua dhe më pas u la me masë sigurimi “detyrim paraqitjeje” nga Gjykata e Durrësit, me akuzën e përhapjes së panikut.
Këshilli Shqiptar i Medias, një organizatë jofitimprurëse në Tiranë, e cila akuzoi kryeministrin Edi Rama se po mbyll në mënyrë të jashtëligjshme median online, duke shfrytëzuar situatën e emergjencës të shkaktuar nga tërmeti i 26 nëntorit.
Megjithëse kryeministri ka bërë akuza ndaj medias thuajse në çdo dalje publike është e paqartë se cilave lajme panik përpahëse u referohet ai.