Gjykata e Lezhës ka lënë në burg 30-vjeçarin Arian Meli, i cili u arrestua nga policia katër ditë më parë për përvetësim të fondeve për ndihmë ndaj të prekurve prej tërmetit.
Gjykata e Lezhës ka lënë në burg 30-vjeçarin Arian Meli, i cili u arrestua nga policia katër ditë më parë për përvetësim të fondeve për ndihmë ndaj të prekurve prej tërmetit. Meli akuzohet për dy vepra penale “mashtrim kompjuterik “dhe “fallsikim kompjuterik”.
Në seancën e zhvilluar me dyer të mbyllura 30-vjeçari pretendoi se llogaritë i ka hapur me qëllim të mirë dhe se paratë do i dërgonte në destinacion. Avokati ka kërkuar masën më të butë me argumentin se është i sëmurë.
Por duke ju referuar provave dhe fakteve të paraqitura nga prokuroria gjykata e vlerësoi të ligjshëm arrestimin e tij në flagrancë, duke vendosur që ta lërë në burg 30-vjeçarin.
Nga hetimet e prokurorisë rezulton se Arjan Meli nëpërmjet rrjetit social ‘Facebook’, ai kishte hapur një llogari me emrin “Rilindje”. Në këtë faqe, 30-vjeçari kishte postuar një status në emër të kryeministrit, ku u bënte thirrje qytetarëve për solidarizim duke kontribuar në vlera monetare në dy numra llogarie, të cilat ky shtetas i kishte publikuar në këtë status.
Numrat e llogarisë ishin llogari private të tij dhe se gjatë kësaj kohe të shkurtër qytetarë të ndryshëm kanë bërë derdhje shumash të ndryshme të cilat sipas prokurorisë kapin një vlerë të konsiderueshme. Policia e Shtetit, në bashkëpunim me strukturat e tjera të Inteligjencës Financiare dhe të sistemit bankar morën menjëherë masa për bllokimin e llogarive.
