Prokuroria e Durrësit ka urdhëruar ndalimin e 17 personave që dyshohen se mbajnë përgjegjësi penale për shembjen e ndërtesave, duke shkaktuar dhjetra viktima në Durrës gjatë tërmetit të 26 nëntorit.
Policia e Shtetit ka ndaluar të shtunën 9 personave dhe po punon për ekzekutimin e urdhrave të Prokurorisë për 8 të tjerë, të dyshuar si përgjegjës për ndërtim në kundërshtim me rregullat dhe shpërdorim detyre, veprime të cilat dyshohet se kanë sjellë dëmtimin e të ptaktën 4 ndërtesave gjatë tërmetit të 26 nëntorit, me pasojë humbjen e jetëve njerëzore.
Kreu i Prokurorisë së Durrësit, Anita Jella, deklaroi në një konferencë për shtyp të shtunën, se krahas hetimeve të kryera menjëherë pas tërmetit nga policia gjyqësore, Prokuroria e Rrethit Gjyqësor Durrës ka hapur kryesisht procedimin penal nr. 2466.
“Ky procedim është regjistruar fillimisht për veprat penale të shpërdorimit të detyrës dhe ndërtimit të paligjshëm dhe në këtë fazë hetimi, pas kryerjes së veprimeve hetimore intensive, të cilat kanë një natyrë shumë komplekse – bëhet fjalë për një procedim penal që ndodh për herë të parë, ka bërë të mundur nxjerrjen e urdhrave të ndalimit për 17 raste dhe po hetohet dhe në vijim,” tha Jella.
“Në këtë fazë të hetimit është çmuar se ndaj disa prej këtyre shtetasve të regjistrohet emri për veprën penale të vrasjes e krye me dashje indirekte,” nënvijëzojë Jella, duke shtuar se hetimet po vazhdojnë edhe për objektet për të cilat kanë pasur dëmtime.
Tërmeti shkatërrimtar 6.4 i shkallës Rihter i 26 nëntorit, shkaktoi 51 viktima dhe më shumë se 900 të plagosur në Durrës, Krujë, Tiranë dhe Lezhë, ndërkohë që qindra ndërtesa u dëmtuan duke u kthyer në të pabanueshme dhe mijëra vetë u lanë të pastrehë.
Mes të ndaluarave policia ka identifikuara ish-drejtorin e ALUIZNIT-të në Durrës, Arben Isaku, i cili dyshohet për shpërdorim detyre, drejtorin aktual të shtëpisë së pushimit të Ministrisë së Brendshme, Ahmet Doda, i dyshuar gjithashtu për shpërdorim detyre dhe shefin e shërbimeve të kësaj shtëpia pushimi, Kujtim Hasa, i dyshuar për vrasje me dashje. Policia ka ndaluar gjithashtu dy zyrtarë të tjerë nga ALUIZNI dhe IKMT. Mes të ndaluarve janë dhe pronarët e hoteleve të shembur nga tërmeti, ‘Miramare’ dhe ‘Tropikal.’
Sipas policisë 8 nga të dyshuarit për të cilët është nxjerrë urdhër arresti por që nuk janë ndaluar, janë larguar nga vendi menjëherë pas tërmetit, ndërsa një prej të dyshuarave është larguar për arsyet familjare.
Lista e personave të ndaluar:
1-Arben Isaku, 42 vjeç, me detyrë ish-drejtor i ALUIZNI-it Durrës, i dyshuar si autor i veprës penale “Shpërdorimi i detyrës”.
2-Klajdi Lame, 32 vjeç, në cilësinë e inspektorit të Inspektoratit Ndërtimor Urbanistik Durrës, në objektin pallat 6- katësh, i cili ndodhet në lagjen Nr. 6, rruga “Shoqëria Bashkimi”, ku humbën jetën dy shtetase, i dyshuar si autor i veprës penale “Shpërdorimi i detyrës”.
3-Albrend Qetka, 35 vjeç, në cilësinë e specialistit të verifikimit në terren pranë ALUIZNI-it, Durrës, në objektin pallat 6- katësh, i cili ndodhet në lagjen Nr. 6, rruga “Shoqëria Bashkimi”, ku humbën jetën dy shtetase, i dyshuar si autor i veprës penale “Shpërdorimi i detyrës”.
4-Kujtim Hasa, 53 vjeç, në cilësinë e shefit të shërbimeve të shtëpisë së pushimit të Ministrisë së Brendshme, i dyshuar si autor i veprës penale “Vrasja me dashje”.
5-Ahmet Doda, 52 vjeç, në cilësinë e drejtorit të shtëpisë së pushimit të Ministrisë së Brendshme, i dyshuar si autor i veprës penale “Shpërdorimi i detyrës”.
6-Rruzhdi Xheka, 79 vjeç, në cilësinë e ndërtuesit informal në objektin “Hotel Mira Mare”, ku humbën jetën 2 shtetas, i dyshuar si autor i veprës penale “Vrasja në rrethana të tjera cilësuese”.
7-Avdulla Osmani, 61 vjeç, në cilësinë e ndërtuesit informal të legalizuar më vonë në menyrë të paligjshme të objektit “Hotel Tropikal”, ku humbën jetën 2 shtetas kosovarë, i dyshuar si autor i veprës penale “Vrasja në rrethana të tjera cilësuese”.
8-Defrim Celami, 44 vjeç, në cilësinë e specialistit që ka përpiluar aktin e ekspertimit teknik në objektin pallat 6- katësh, i cili ndodhet në lagjen Nr. 6, rruga “Shoqëria Bashkimi”, ku humbën jetën dy shtetase, i dyshuar si autor i veprës penale “Shpërdorimi i detyrës.
9- Nevjana Isufi, 45 vjeçe, e cila me studion e saj private hartonte projekte fiktive, e dyshaur si autore e veprave penale “Shpërdorimi i detyrës” dhe “Falsifikimi i dokumenteve”.
