Makina e prokurorit të Vlorës Albert Kuliçi u hodh në erë me një sasi tritoli. Kreu i gjykatës së Vlorës e cilësoi sulmin si “atentat ndaj drejtësisë”.
Makina e prokurorit të Vlorës Albert Kuliçi u hodh në erë mëngjesin e të shtunës nga një sasi tritoli që i ishte vendosur nga persona ende të panjohur. Policia njoftoi se ngjarja kishte ndodhur në orën 6.45 në lagjen “29 Nëntori” ndërsa bëri me dije se bashkë me makinën e prokurorit ishte dëmtuar edhe mjeti i një qytetari që ndodhej pranë.
“Si pasojë e shpërthimit dyshohet se është dëmtuar pjesërisht edhe një automjet tjetër i parkuar afër. Nuk ka dëme në njerëz, por vetëm dëme materiale. Mjeti Volksëagen është në pronësi të shtetasit A.K, me detyrë Prokuror pranë Gjykatës së Shkallës së Parë Vlorë”, njoftoi policia.
Menjëherë pas atentatit në shtëpinë e Kuliçit kanë shkuar kolegë dhe gjyqtarë të Vlorës, ndërsa në qytet mbërritën ekspertë të njësisë antieksploziv nga Tirana. Në një bisedë telefonike për BIRN kreu i Gjykatës së Shkallës së Parë në Vlorë Skënder Haluci tha se Kuliçi ishte një nga prokurorët më të mirë në Shqipëri. “Atentati është një sulm ndaj drejtësisë”, tha Haluci.
BIRN mësoi se Kuliçi kishte në hetim një sërë çeështjesh mbi tjetërsimin e pronave në bregdet dhe po ashtu hetime të tjera të rëndësishme, por ende nuk është e qartë se cili është motivi i atentatit.
Ky nuk është antentati i parë ndaj funksionarëve të drejtësisë gjatë këtij viti. Më herët më 25 nëntor makina e Andri Ymerit gjytar i Gjykatës së Shkallës së Parë në Shkodër u dogj. Ndërkohë që në fillim të nëntorit prokurori i Durrësit Arjan Ndoja u sulmua me armë. Në atentat mbeti i vrarë shoferi i Ndojës, ndërsa prokurori dhe një person i identifikuar si Pëllumb Muharremaj, i cili sipas policisë ka një sërë precedentësh penalë.
Ndërkohë në qytetin e Vlorës shkatërrimi i makinave me zjarr dhe eksploziv është kthyer në një model kërcënimi. Në një investigim të mëparshëm BIRN gjeti se shumica e sulmeve të kësaj natyre nuk zbardheshin.