Një person i identifikuar si ish-shofer i Bashkisë Lushnje dyshohet se hodhi një granatë në zyrën e kryebashkiakut Fatos Tushe, duke plagosur këtë të fundit dhe sekretaren e tij.
Kryebashkiaku i Lushnjes Fatos Tushe dhe sekretarja e tij mbetën të plagosur pasi një person i identifikuar si ish-shofer i bashkisë hodhi mëngjesin e të martës një granatë në zyrën e kryetarit.
Policia e Shtetit konfirmoi atentatin dhe bëri me dije se forca të shumta të saj ishin në kërkim të atentatorit. “Në zyrën e Kryetarit të Bashkisë Lushnjë, dyshohet se është hedhur një granatë dore dhe për pasojë është dëmtuar Kryetari i Bashkisë shtetasi Fatos Tushe dhe sekretarja e Bashkisë, shtetasja E. Q., të cilët ndodhen në spitalin e Lushnjës, nën kujdesin e mjekëve”, thuhet në njoftimin paraprak të policisë.
Policia po ashtu bëri më dije se dyshohej që autor i kësaj ngjarjeje ishte ish-shoferi i Kryetarit të Bashkisë i cili u identifikua si G.S. “Shtetasi G. S., i cili pasi ka hedhur granatën është larguar menjëherë nga ambientet e Bashkisë Lushnjë”, njoftoi policia. Sipas saj forca të shumta policie përfshi forcat RENEA dhe FNSH-në e Fierit janë vënë në kërkim të autorit të dyshuar.
Po ashtu policia bëri me dije se ishte ngritur një grup i posaçëm hetimor, për të zbardhur ngjarjen motivet e të cilës janë ende të paqarta.