Krahu ekzekutiv i BE-së dënon “çdo formë diskriminimi bazuar në orientimin seksual ose identitetin gjinor”.
Komisioni Europian ka dënuar rezolutat anti-LGBT të miratuara nga bashkitë lokale në një të tretën e Polonisë, si shkelje të vlerave themelore të Bashkimit Europian.
“Qëndrimi i Komisionit është i qartë”, tha një zëdhënës për krahun ekzekutiv të BE-së, duke iu përgjigjur një artikulli të BIRN që tregon se disa komuna polake në një zonë më të madhe se Hungaria kanë miratuar rezolutat “kundër propagandës LGBT” ose “pro-familjes”.
“Ne dënojmë me forcë çdo formë diskriminimi ose dhune në bazë të orientimit seksual ose identitetit gjinor, që shkojnë kundër vlerave themelore të BE-së dhe Kartës së të Drejtave Themelore.”
Pothuajse 100 komuna në Poloninë juglindore kanë miratuar rezoluta që grupet e të drejtave të njeriut thonë se krijojnë hapësira armiqësore për anëtarët e komunitetit LGBT. Aktivistët kanë krijuar një hartë të titulluar “Atlasi i urrejtjes” që tregon këto rajone.
Në dhjetor, Parlamenti Europian nxori një rezolutë “duke dënuar ashpër ‘zonat pa LGBTI në Poloni’”.
Zëdhënësi tha se Komisioni Europian “po mbante shënim” për rezolutën e Parlamentit Europian, “të cilën në do ta studiojmë nga afër”. Ai gjithashtu do të vazhdojë të ndjekë situatën në Poloni.
Zëdhënësi iu referua një fjalimi të bërë në 4 shkurt nga Helena Dalli, Komisionerja Europiane për Barazi, në një takim të Parlamentit Europian për të drejtat e BE-së dhe LGBTI.
“Fenomeni më shqetësues për mua është numri në rritje i sulmeve të dhunshme kundër personave LGBTI, siç janë sulmet në marshimet e Krenarisë, shpërndarja e afisheve për të shënuar lagje dhe qytete të tëra si zona pa LGBTI, si edhe miratimi i rezolutave anti-LGBTI”, tha në fjalim komisionerja Dalli.
“Këto veprime synojnë qartazi të kanosin dhe të përhapin frikë thjesht për disa fitore të vogla politike në kurriz të pakicave të cenueshme.”
Dalli shtoi: “Më lejoni të jem shumë e qartë. Ne nuk mund të lejojmë shpërndarjen e afisheve për të shënuar zona pa LGBTI, ose miratimin e rezolutave anti-LGBTI dhe të mos ndihemi përgjegjës për fazën tjetër, ku ndodhin sulme fizike, edhe nëse ato kryen nga njerëz të tjerë.
“Në këtë kontekst, më lejoni të përsëris se Komisioni dënon çdo formë dhune, urrejtje ose diskriminimi ndaj personave LGBTI dhe se nuk do të hezitojë të ndërmarrë ndonjë veprim të nevojshëm brenda kufijve që i janë dhënë nga marrëveshjet.”
Më 26 shkurt, ministria spanjolle për barazinë dënoi rezolutat polake, duke shkruar në Twitter: “Ne i dënojmë këto rezoluta që prekin të drejtat e njeriut të komunitetit LGBTI, përhapin gjuhë urrejtjeje dhe legjitimojnë, në një nivel institucional, fobinë ndaj LGBTI-së.”
