Mbi 100 vende kanë raportuar deri më sot raste të infektimit me koronavirus ndërsa sëmundja po vihet nën kontroll në Kinë dhe po përhapet me shpejtësi në Itali, Iran, SHBA dhe vende të tjera.
Numri i të infektuarve në të gjithë botën ka arritur në 110 mijë me rreth 4 mijë raste të reja të shënuara në 24 orët e fundit. Numri i të vdekurve nga COVID-19 ka arritur në 3,800, sipas llogaritjeve të kryera nga Reuters mbi deklarimet e qeverive.
Në Kinën kontinentale, ku filloi sëmundja, të dielën u shënuan 40 raste të reja, një shifër kjo në ulje në krahasim me 44 rastet e të shtunës. Rastet totale të konfirmuara ishin 80,735 ndërsa të vdekurit ishin 3,119.
Europë
– Në Mbretërinë e Bashkuar të prekurit nga sëmundja arritën në 273 me një rritje 30% në krahasim me të shtunën. Numri i të vdekurve arriti në 3.
– Italia, vendi më i prekur në Europë, urdhëroi bllokimin e hyrje-daljeve në një pjesë të madhe të veriut të vet të pasur, përfshirë kryeqytetin financiar të vendit Milano, në një përpjekje të re drastike për të kufizuar përhapjen e koronavirusit.
– Numri i të vdekurve në Itali u rrit në 266 vetë nga 233 të shtunën. Numri total i rasteve u rrit me shpejtësi nga 5,883 në 7,375 vetë.
– Autoritetet në Francë thanë se deri tani në vend kanë vdekur 19 vetë, Numri i rasteve të identifikuar u rrit me mbi 500 brenda fundjavës.
– Numri i të prekurve në Gjermani arriti në 902 vetë nga vetëm 66 raste që ishin më 28 Shkurt. Ministri i Shëndetësisë Jens Spahn bëri thirrje që organizuesit e aktiviteteve publike masive të anulojnë këto aktivitete dhe i bëri thirrje popullsisë të qëndrojë në shtëpi.
– Bullgaria raportoi katër rastet e para të vetat në fundjavë.
– Shqipëria raportoi rastin e parë të Dielën në mbrëmje.
– Në Ballkan, Kosova dhe Mali i Zi janë të vetmet vende që nuk kanë ende raste koronavirusi.
– Moldavia raportoi rastin e parë të shtunën.
– Malta raportoi rastin e parë të Shtunën, një vajzë 12 vjeçare italiane që jeton në ishull.
– OBSH thotë se tashmë më shumë se sa gjysma e shteteve të botës ose mbi 100 shtete kanë raportuar së paku një rast.
– Shumica e shteteve të Shteteve të Bashkuara të Amerikës kanë raportuar raste me koronavirus ku një epiqendër e madhe është shteti i Uashingtonit në bregun e Paqësorit. Për momentin këshillat për popullsinë është që të shmangin grumbullimet masive ndërsa nuk përjashtohet mundësia e karantinimit në masë.
– Një pacient i diagnostikuar me koronavirus vdiq në Argjentinë të Shtunën, duke shënuar viktimën e parë të virusit në Amerikën Latine.
– Paraguaji regjistroi rastin e parë të Shtunën.
– Në Azi, Koreja e Jugut raportoi 69 raste të reja gjë që e rrit totalin e infektimeve në këtë vend në 7,382.
– Bangladeshi njoftoi tri rastet e para, dy prej të cilëve ishin kthyer së fundmi nga Italia.
– Në Lindjen e Mesme, Irani njoftoi se deri tani ka 6,566 infektime dhe 194 të vdekur.
– Një turist 60 vjeçar gjerman vdiq në Egjipt duke u bërë viktima e parë e koronavirusit në këtë vend.
– Arabia Saudite ka regjistruar 15 raste ndërsa të Dielën urdhëroi mbylljen e përkohshme të qarkullimit në provincën e Qatifit në lindje të vendit, ku jeton një popullsi e madhe myslimanësh shia.
– Në Afrikë, Kameruni dhe Togo konfirmuan rastet e para të Premten. Në të gjithë Afrikën nën-Sahariane aktualisht janë regjistruar pesë raste.