Dy të arrestuar me drogë dhe gomone në Kurbin u lanë me masë sigurie arresti në burg, ndërsa po hetohet nëse kishin bashkëpunëtorë.
Gjykata e Rrethit Gjyqësor Kurbin la në burg 2 personat e arrestuar të enjten, në tentative për të trafikuar përmes detit një sasi lëndë narkotike canabis sativa. “Në bazë të provave të paraqitura nga organi i akuzës, në seancën e zhvilluar me dyer të mbyllura gjykata e cilësoi të ligjshëm arrestimin në flagrancë të shtetasve Safer Zela 60-vjeç dhe Roland Sula 28-vjeç, dhe ndaj tyre vendosi masën e sigurisë “arrest në burg’”, thuhet në dispozitiv.
Ndërkohë avokatët e të akuzuarve kërkuan masë më të butë ndaj klientëve të tyre, por kjo nuk u pranua nga trupa gjykuese.
Safer Zela dhe Roland Sula u arrestuan nga policia, pasi gjatë kontrollit të ushtruar në vendin e quajtur “Godull”, Kurbin, në një ambient në pronësi të Safer Zelës gjetën dhe sekuestruan 613 kg lëndë narkotike cannabis sativa. Ndërkohë në një ambient tjetër, po në pronësi të këtij shtetasi gjetën dhe një gomone.
Gjithashtu gjatë kontrollit në banesën e 60-vjeçarit është gjetur dhe sekuestruar një armë gjahu dhe 13 fishekë. Nga hetimet e para dyshohet se këta persona, në bashkëpunim me njëri-tjetrin do trafikonin lëndën narkotike përmes detit. Ndaj dy të arrestuarve janë ngritur akuzat për veprat penale “Trafikim i narkotikëve”, kryer në bashkëpunim, mbetur në tentativë dhe “Mbajtja pa leje e armëve të gjuetisë”.