Drejtuesit e partive politike arritën një konsensus për të shtyrë zgjedhjet e përgjithshme të 12 prillit për shkak të shqetësimeve në lidhje me koronavirusin, por nuk kanë caktuar ende një datë të re për mbajtjen e tyre.
Krerët e partive kryesore politike të Maqedonisë së Veriut u takuan të martën në pallatin presidencial në Shkup dhe ranë dakord për të shtyrë zgjedhjet e parakohshme, të cilat fillimisht u caktuan për më 12 prill.
Megjithatë, modalitetet për shtyrjen dhe një datë të re për mbajtjen e zgjedhjeve nuk janë përcaktuar ende.
“Ne autorizuam presidentin, Stevo Pendarovski, që të thërrasë një grup ekspertësh dhe të gjejë modalitetet ligjore dhe morale për shtyrjen e zgjedhjeve dhe për caktimin e një date të re për mbajtjen e tyre”, u tha gazetarëve kreu i partisë kryesore qeverisëse Zoran Zaev.
“Unë besoj se konsensusi që kemi arritur është një mesazh serioz për të gjithë”, tha Zaev pas takimit, i cili zgjati më shumë se tre orë.
Ai shtoi se shpreson që së shpejti në vend të shpallet gjendja e jashtëzakonshme, i cili aktualisht ka 26 të prekur me koronavirus.
Por kreu i partisë kryesore të opozitës VMRO DPMNE, Hristijan Mickovski, u tha gazetarëve se partia e tij do të vazhdojë të insistojë për një nivel më të lartë emergjence dhe vendosjen e të ashtuquajturës “gjendje krize” për 30 ditë.
“Por ekspertët duhet të kenë të drejtë fjale mbi mënyrën sesi ta bëjmë këtë”, tha Mickoski.
Bilal Kasami, kreu i lëvizjes BESA, e cila ka dy deputetë në parlament, tha se vendimi për shtyrjen e zgjedhjeve u mor “unanimisht”, por se një datë e re “do të varet nga ekspertët ligjorë”.
Ziadin Sela nga Aleanca për Shqiptarët tha se shëndeti i njerëzve tani duhet të ketë përparësi ndaj zgjedhjeve.
Kreu i Partisë së vogël Demokratike të Shqiptarëve, Menduh Thaçi, u largua nga mbledhja herët, duke thënë se nuk kishte asgjë për të bërë atje sepse “vendimet tashmë janë marrë dhe ne si parti politike shqiptare shërbejmë vetëm si dekor”.
Ndërsa numri i të infektuarve vazhdon të rritet, Maqedonia e Veriut së fundmi shpalli gjendjen e jashtëzakonshme në dy komunat më të prekura në perëndim të vendit, Dibër dhe Qendër Zhupa. Vendi gjithashtu mbylli pikat kufitare për qytetarët e huaj dhe i kërkoi diasporës së saj të udhëtojë për në shtëpi vetëm në raste të domosdoshme.
Zgjedhjet e muajit prill do të shihnin një betejë të ashpër midis aleancës qeverisëse të udhëhequr nga Social Demokratët pro-perëndimorë të Zaevit dhe krahu i djathtë, VMRO DPMNE, e cila këmbëngul që progreset e fundit euro-atlantike të vendit u bënë në kurriz të interesave kombëtare, siç ishte ndryshimi i emrit të vendit në marrëveshjen e tij me Greqinë.
Ndërkohë vendi është udhëhequr që nga fillimi i vitit nga një qeveri e përkohshme, duke përfshirë ministra nga të dy blloqet.
