Një i sëmurë me Covid-19 u identifikua të Hënën në një kompani fasonerie në kryeqytet, ndërsa Organizata Politike akuzoi qeverinë se i kishte lënë pa mbrojtje këtë pjesë të shoqërisë.
Organizata Politike njoftoi në Facebook të hënën se një prej rasteve të reja me Covid-19 në Shqipëri ishte i një punonjëse në një prej fasonerive të qytetit, ndërsa ngriti alarmin se punëtorët e kësaj industrie ishin ndër më të rrezikuarit dhe ishin të braktisur prej qeverisë, ndërsa vijonin të punonin në salla masive me dhjetra e qindra punëtorë në një vend.
“Është konfirmuar rasti i parë i një punëtoreje 38-vjeçare të infektuar me virusin Covid-19 në fasonerinë ProDyn, ku punojnë rreth 1000-1200 punëtorë”, thuhet në statusin e Organizatës Politike në Facebook. Përfaqësues të OP me të cilët BIRN foli thanë se kishin biseduar me punëtorë të ndërmarrjes dhe se u ishte thënë që në kompani nuk ishin marrë masa edhe pse rasti sipas tyre ishte njoftuar tre ditë më parë dhe se punëtorë të tjerë kishin shfaqur shenjat.
“Organizata Politike denoncon papërgjegjshmërinë kriminale që po tregon qeveria e Edi Ramës ndaj punëtorëve dhe qytetarëve të këtij vendi, duke lejuar vazhdimin e punës nëpër fabrika ku punojnë së bashku me qindra punëtorë”, thuhet në reagim.
Administratorja e kompanisë ProDyn Etleva Laro konfirmoi rastin e punonjëses, por mohoi akuzat se kishte më shumë se një rast. Laro tha në një bisedë telefonike për BIRN se kishin pezulluar punën për dy javë menjëherë sapo kishin marrë njoftimin nga punëtorja pa pritur konfirmim zyrtar. “Kemi pezulluar punën për dy javë. Nuk është e vërtetë që ka pasur raste të tjera”, tha Laro.
Ajo po ashtu shtoi se gruaja e sëmurë nuk kishte qenë në punë ditët e fundit. “Herën e fundit ka qenë në punë të mërkurën”, tha Laro, ndërsa tha se ishin marrë menjëherë masat dhe puna ishte pezualluar që në mëngjesin e të hënës.
Punonjësit e Call Center dhe fasonerive janë ndër më të mëdhejtë dhe po ashtu janë konsideruar si problematike, ndërsa mjaft prej të punësuarve thonë se nuk kanë alternativë tjetër përvecc se të paraqiten në punë.
Lexo edhe:
Covid-19, punonjësit e një Call Center në karantinë, pas dyshimeve për një të prekur
‘Kush nuk punon, nuk paguhet’: Call Center dhe fasonët rinisin punën mes pasigurive
