Përmes dy vendimeve të veçanta, bordi drejtues i Fondit Monetar Ndërkombëtar akordoi 174 milionë euro kredi për Shqipërinë dhe 52 milionë euro kredi për Kosovën për t’u përballur me problemet ekonomike të shkaktuara nga pandemia COVID-19.
Fondi Monetar Ndërkombëtar mbështeti Shqipërinë të përballojë problemet e mundshme me bilancin e pagesave të Shqipërisë duke ofruar kredi me vlerë 174 milionë euro përmes Instrumentit të Përgjigjes së Shpejtë, një mekanizëm financiar që aktivizohet në rastet e katastrofave natyrore apo goditjeve të tjera të papritura.
Nën të njëjtin mekanizëm, Kosovës iu akordua afro 52 milionë euro kredi.
FMN pret që ekonomia shqiptare të reduktohet gjatë këtij viti “në mënyrë domethënëse” për shkak të goditjes së dyfishtë nga tërmeti i 26 Nëntorit 2019 dhe nga pandemia COVID-19, por ajo pritet të rimëkëmbet shpejt në vitin 2021.
Fondi i ndërhyrjes së shpejtë ndihmon vendet anëtare të FMN-së të plotësojnë nevojat e tyre urgjente të krijuara pas një goditjeje që mund të reduktojë të ardhurat e vendit në valutë të fortë.
Shqipëria pritet të vuajë nga pandemia veçanërisht për shkak të varësisë që ka nga remitancat, paratë e sjella nga emigrantët në atdhe, si dhe të ardhurat nga turizmi.
Financimi i ofruar për Shqipërinë dhe Kosovën është i barabartë me gjysmën e vlerës së kuotave që këto dy vende kanë në FMN si vende anëtare.
FMN këshilloi gjithashtu qeverinë të realizojë një deficit të lartë buxhetor këtë vit të pasuar nga një shtrëngim dhe disiplinë financiare në vitet në vijim.
“Një rritje e madhe e deficitit fiskal të vitit 2020 është i nevojshëm për të kufizuar impaktin e COVID-19. Do të jetë me rëndësi kritike që të sigurohen shpenzimet e nevojshme për kujdes shëndetësor dhe për mbështetje të njerëzve dhe kompanive që janë dëmtuar nga pandemia,” thuhet në njoftimin e FMN. “Sapo tronditjet të kapërcehen, do të jetë e rëndësishme të mbahet borxhi publik në një rrugë të qartë drejt uljes,” vijon më tej deklarata.
Qeveria shqiptare aktuale i ka bërë bisht në mënyrë të përsëritur gjatë viteve të fundit këshillave të FMN-së për disiplinë financiare, ulje të borxhit publik dhe mosndërmarrjes së kontratave të kushtueshme koncesionare. Në mungesë të uljes së borxhit publik dhe të kontratave koncesionare me përmasa të mëdha, qeveria ka pak hapësirë për të rritur borxhin publik në kushtet e një fatkeqësie, si kjo e COVID-19.