Numri i rasteve të reja u rrit sërish të shtunën, kur 17 persona rezultuan të infektuar me koronavirusin e ri, ndërkohë që harta e infeksionit vazhdon të zgjerohet në Tiranë dhe Shkodër.
Shqipëria shënoi sërish rritje të rasteve të reja me COVID-19 të shtunën, kur 17 pacientë të rinj rezultuan bartës ose të sëmurë me koronavirusin e ri. Sipas zv.ministres së Shëndetësisë, Mira Rakacolli, rastet e reja u zbuluan gjatë testimit të 259 personave të dyshuar në 24 orët e fundit, duke e çuar numrin total të personave të prekur në Shqipëri në 433.
Numri më i lartë i rasteve të reja u zbulua në Tiranë, ku listës së të prekurve iu shtuan edhe 10 persona të tjerë. Tirana është vatra më e madhe e infeksionit të COVID-19 në Shqipëri dhe numëron 209 raste ose 48% të numrit total.
Vatra e infeksionit vazhdon gjithashtu të zgjerohet në qytetin e Shkodrës, ku në 24 orët e fundit u zbuluan edhe 3 raste të reja. Të shtunën, numri total i personave të infektuar në Shkodër shoi në 52 persona ose 12% e të gjitha rasteve të identifikuara në Shqipëri.
Katër rastet e tjera u zbuluan në Durrës, Pukë, Krujë dhe Lushnje.
Të shtunën u rrit gjithashtu numri i të prekurve që po trajtohen në dy qendrat spitalore të Tiranës. 60 pacientë ndodhen aktualisht të shtruar në Shërbimin Infektiv në Tiranë si dhe në spitalin e mushkërive “Shefqet Ndroqi”, 11 prej të cilëve janë në terapi intensive dhe 6 prej tyre ndodhen të intubuar.
Nga fillimi i epidemisë së COVID-19 në Shqipëri kanë humbur jetën 23 pacientë si dhe janë shëruar nga sëmundja 197 persona. Vetëm në 24 orët e fundit u shëruan edhe 15 pacientë të tjerë, ndërsa zv.ministrja Rakacolli tha se Shqipëria mban vendin e parë në rajon për shërueshmërinë.
Apeli i Ministrisë së Shëndetësisë shkoi sërish për zbatimin e masave të distancimit social brenda rretheve familjare, ku së fundmi po zbulohet edhe numri më i madh i rasteve të reja.
“Një pjesë e mirë e tyre kanë qenë raste kontaktesh, të cilët nuk kanë zbatuar masat e distancimit social. Janë njerëz të grumbulluar në vizita familjare të pacientëve të infektuar, duke u infektuar edhe ata vetë,” tha zv.ministrja Rakacolli në deklaratën për mediat.
“Distancimi social të vazhdojë të respektohet edhe brenda rrethit familjar. Mos shkoni për vizitë te familjarët tuaj për asnjë lloj arsyeje,” shtoi Rakacolli.