Përmes një akti normativ me fuqinë e ligjit, subjektet e tatimit të thjeshtuar mbi fitimin e biznesit të vogël nuk do të kenë nevojë të nguten për të paguar këtë tatim brenda datës 20 prill, por kanë kohë deri në 20 tetor.
Qeveria shqiptare ka vendosur të lejojë bizneset e vogla që këtë vit të paguajnë më vonë këstet tremujore të tatimit të thjeshtuar të fitimit, i cili parapaguhet në bazë të të dhënave fiskale të vitit të mëparshëm.
Përmes një akti normativ të publikuar në faqen e Kuvendit të Shqipërisë në internet, sanksionohet që këto pagesa për tremujorin e parë dhe të dytë të bëhen brenda datës 20 Tetor 2020 ndërsa për tremujorin e tretë dhe të katërt, brenda datës 20 dhjetor 2020.
Ndryshimi pritet të ketë impakt të ulët në gjendjen ekonomike të biznesit të vogël për shkak se tatimi i thjeshtuar i fitimit për këtë biznes është bërë një taksë e parëndësishme. Gjatë vitit 2019, të 95 mijë bizneset e vogla paguan bashkërisht rreth 400 milionë lekë për këtë tatim, sipas të dhënave të Ministrisë së Financave.
