Në 24 orët e fundit u testuan 233 persona, nga të cilët 13 rezultuan pozitivë me COVID-19, duke zgjeruar hartën e infeksionit në Tiranë, Shkodër dhe Durrës.
Trembëdhjetë raste të reja me COVID-19 u regjistruan të dielën, duke e çuar numrin total të personave të infektuar në Shqipëri në 446 persona. Marjeta Dervishi nga Instituti i Shëndetit Publik tha në një deklaratë për mediat se 6 raste të reja u zbuluan në Tiranë, pesë në Shkodër dhe dy rastet e tjera në Durrës.
Sipas ISHP, 49 persona të infektuar nga koronavirusi i ri, COVID-19 ndodhen në trajtim mjekësor në dy spitalet e vendosura në dispozicion për kontrollin e epidemisë. Mes tyre, 12 pacientë janë në terapi intensive, shtatë prej të cilëve në gjendje më të rëndë dhe të intubuar.
Gjatë 24 orëve të fundit, 20 pacientë i janë shtuar listës së personave të shëruar, duke rezultuar negativë në të dy testet e kryera. Numri total i personave të shëruar është 217 ose 48% e të gjithë personave të infektuar.
Që prej fillimit të epidemisë, 23 persona kanë humbur jetën si pasojë e COVID-19.
Tirana, Shkodra dhe Durrësi vazhdojnë të mbeten vatrat më të mëdha të infeksionit të koronavirusit të ri në Shqipëri. Rastet e reja janë identifikuar gjithashtu në këto tre bashki nga 233 testime të kryera në të gjithë vendin gjatë së shtunës dhe së dielës.
“Rastet e reja janë kontakte të rasteve të mëparshme të prekur me COVID-19. Hetimi epidemiologjik po vazhdon,” tha Dervishi në deklaratën për mediat.
Numri i të prekurve në Tiranë u rrit në 215 personave ose 48% e të gjitha rasteve të zbuluara në vend. Shkodra mban vendin e tyre me 57 raste ose 12% të totalit, ndërsa Durrësi në vendin e tretë ka 41 pacientë ose 9% të të gjitha rasteve të zbuluara në Shqipëri.
Situata në 14 bashkitë e tjera të prekura nga koronavirusi nuk ka ndryshuar në 24 orët e fundit.
