Nga 193 testime të kryera në 24 orët e fundit, 21 persona rezultuan pozitivë, duke e çuar numrin total të të prekurve në 467. Gati 60% e rasteve të reja u zbuluan në Shkodër.
Numri i personave të prekur me COVID-19 në Shqipëri shkoi në 467 të hënën, ndërsa Instituti i Shëndetit Publik zbuloi 21 raste të reja në 24 orët e fundit. Drejtoresha e ISHP-së, Albana Fico deklaroi përmes mediat se rastet e reja ishin zbuluar mes 193 testimeve të kryera, ndërsa pozitivë kanë rezultuar edhe një personel shëndetësor dhe dy fëmijë, të cilët nuk shfaqin simptoma të sëmundjes.
Më shumë se gjysma e rasteve të reja u zbuluan në bashkinë e Shkodrës – e kthyer tashmë në vatrën e dytë më të madhe të infeksionit në vend. Në 24 orët e fundit rezultuan pozitivë në këtë bashki 13 persona, duke e çuar numrin total të të prekurve në 70 raste.
Harta vazhdon të zgjerohet edhe në Tiranë me 6 raste të reja dhe me 221 persona të infektuar në total. Dy rastet e tjera me COVID-19 u zbuluan në Durrës dhe në Has.
“Rastet e identifikuara në 24 orët e fundit janë kontakte të rasteve të mëparshme, ndërsa po vazhdojmë hetimin epidemiologjik,” deklaroi Fico të hënën, duke përsëritur apelin për distancim social edhe brenda rretheve familjare.
Mes personave të prekur, 52 pacientë ose 11% e totalit po trajtohen aktualisht në dy spitalet e vendosura në dispozicion të të sëmurëve me COVID-19. Në Shërbimin Infektiv dhe në spitalin “Shefqet Ndroqi” ndodhen aktualisht 14 persona në terapi intensive, 7 për të cilëve janë në gjendje më të rëndë dhe të intubuar.
Që prej fillimit të epidemisë kanë humbur betejën me sëmundjen 23 persona, ose 4.9% e të gjithë të prekurve të identifikuar. Gjatë 24 orëve të fundit, 15 pacientë të tjerë kanë rezultuar të shëruar, duke e çuar numrin e të mbijetuarve në Shqipëri në 232.
Të hënën, qeveria shqiptare vendosi të aplikojë lehtësimin e parë të masave kundër përhapjes së COVID-19 me zgjerimin e fashës orare deri në orën 17:30, ndërkohë që leje-daljet për qytetarët u rritën nga 60 minuta në 90 minuta.
Drejtoresha e ISHP-së, Albana Fico tha se zgjerimi i fashës orare është një përgjegjësi më shumë për qytetarët, të cilëve u bëri thirrje për respektimin e distancimit social dhe ruajtjen e higjienës personale.