KLGJ njoftoi rifillimin e veprimtarisë dhe shërbimeve gjyqësore në gjithë gjykata e vendit më datë 27 prill, duke respektuar masat për parandalimin e përhapjes së COVID-19.
Këshilli i Lartë Gjyqësor, KLGJ, njoftoi të mërkurën më 22 prill rifillimin e veprimtarisë dhe shërbimeve gjyqësore në të gjitha gjykatat e vendit, të hënën, më datë 27 prill. “Veprimtaria e gjykatave do të vijojë sipas kufizimeve të përcaktuara në Aktin Normativ nr.9, datë 25.03.2020, ‘Për marrjen e masave të veçanta në fushën e veprimtarisë gjyqësore, gjatë kohëzgjatjes së gjendjes së epidemisë së shkaktuar nga COVID-19’”, citohet në njoftim.
Sipas KLGJ, për të garantuar sigurinë e publikut, të gjyqtarëve dhe punonjësve të gjykatave, është duke u punuar për marrjen e masave me karakter organizativ dhe administrativ, që rifillimi i veprimtarisë dhe shërbimeve gjyqësore në çdo gjykatë të bëhet në përputhje dhe respektim të masave për kufizimin e përhapjes së COVID-19.
Këshilli i Lartë Gjyqësor ka vendosur edhe rifillimin e veprimtarisë së tij; të procedurave administrative të pezulluara për ngritjen në detyrë në Gjykatën e Lartë; për ngritjen në detyrë në gjykatat e posaçme për korrupsionin dhe krimin e organizuar; për komandimin në Zyrën e Inspektorit të Lartë të Drejtësisë; për komandimin në Shkollën e Magjistraturës dhe në Ministrinë e Drejtësisë, duke zgjatur afatet respektive të kandidimit.
Në aktin Normativ nr. 9, datë 25.03.2020, përcaktohet se në ambientet e gjykatave duhet të merren masat e nevojshme për distancimin social.
Ndërkohë nenin 3 të këtij akti normativ, përcaktohet se seancat gjyqësore, ngritja e padive dhe paraqitja e ankimeve dhe çdo veprim procedural në çështjet administrative, civile dhe penale shtyhen deri në përfundim të gjendjes së epidemisë. Sipas këtij akti lejohet vetëm kryerja e seancave gjyqësore për çështjet e konsideruara “urgjente”.
