Bashkia e Lezhës urdhëroi mbylljen e tregut të përgjithshëm të qytetit të Lezhës një javë më parë pavarësisht se ISHP thotë se të gjithë të prekurit nga koronavirusi në këtë qytet janë shëruar tashmë. Kjo i ka nxjerrë një pjesë të tregtarëve në protestë.
Bashkia e Lezhës urdhëroi mbylljen e tregut pas një inspektimi në të cilin konkludoi se janë shkelur rregullat e nevojshme higjenosanitare por ndonëse ka kaluar një javë nga ky vendim asnjë masë për plotësimin e kushteve nuk është marrë ndërsa tregtarët janë aktualisht yë papunë.
Të mbetur pa zgjidhje, tregtarët zhvilluan një protestë dhe kërkuan takim me përfaqësuesit e bashkisë, por këta të fundit nuk i pritën. Tregtaret thonë se janë taksapagues të rregullt dhe bashkia në koordinim me pronarin e tregut duhet të marrin masa për krijimin e kushteve për mbrojtjen nga koronavirusi. Sipas tyre kjo situatë po i penalizon, pasi nuk kanë asnjë mundësi tjetër të jetuarit.
“Ne jemi tregtarë të rregullt me licencë dhe paguajmë të gjitha detyrimet që duhen si tek pronari ashtu dhe tek shteti. Tani ne kemi ngelur pa punë dhe askush nuk na jep zgjidhje. Pronarin nuk e lejon bashkia me hap tregun pa vendos tunelin e dizinfektimit, por ai na ka thënë se nuk mund të sigurojë diçka të tillë sepse ka shumë kosto. Ne kemi ngelur në mes të 4 rrugëve,” thotë Hasan Pashaj tregtar i fruta-perimeve.
Tregtaret kërkojnë zgjidhjen e këtij problemi me qëllim që të nisin sa më parë punen.
“Bashkia duhet të zgjidhë vetë problemin dhe të hape tregun. Ne kemi të drejtën e punës dhe të zbatojmë të gjitha rregullat që kërkohen. është e pafalshme të na lënë prej 1 javë në mes të 4 rrugëve dhe askush nuk jep përgjigje” thotë Marie Krepi, tregtare.
Në mbështetje të tregtareve ishte edhe Ish-deputetja e Partisë Demokratike Lindita Metaliaj, e cila tha se është detyra e bashkisë për të krijuar kushtet për mbrojtjen nga pandemia.
“Janë 300 familje që sigurojnë jetesën me të ardhurat që sigurojnë nga puna në këtë treg. është e pafalshme që në një situatë pandemie dhe në një krizë të thellë ekonomike, pushtit vendor dhe qendror heqin përgjegjësitë nga vetja e tyre. Bashkia duhet ti japë zgjidhje këtij problemi, pasi merr taksat nga tregtaret. Dezinfektimi nuk është një proces që bëhet nga individi apo nga subjekti është një proces që bëhet me protokoll shtetëror nga institucionet shëndetësore” thotë Metaliaj
Bashkia Lezhë thotë se urdhri për mbylljen e tregut është dhënë pas konstatimit të moszbatimit të masave të sigurisë për mbrojtjen nga COVID-19.
“Tregu është mbyllur për arsye të mos zbatimit të rregullave për mbrojtjen nga koronavirusi. Njësitë tregtare nuk do të lejohen të hapen pa plotësuar të gjitha kushtet sepse është një vatër e përhapjes së koronavirusit” thotë Leonard Pali, drejtues i policisë bashkiake të qytetit.
Lezha është shpallur vatër e mbyllur sa i përket koronavirusit nga Ministria e Shëndetësisë, e cila deklaroi më 26 Prill se të gjithë personat e prekur nga virusi në këtë qytet janë shëruar dhe nuk ka raste aktive.