Të dhënat e publikuara nga shoqata e bankave tregojnë se interesat e kredive të reja gjatë muajit Mars u shtrenjtuan si për biznesin ashtu edhe për individët, si për kreditë në euro, ashtu edhe për lekun.
Kredia e re e dhënë gjatë muajit Mars u shtrenjtua për të gjitha kategoritë kryesore ndërsa volumi i kredisë së re ra ndjeshëm në krahasim me shkurtin. Shoqata shqiptare e bankave publikoi të Premten të dhënat mbi kreditimin gjatë muajit të kaluar, ku vërehet se stoku i kredisë në sistemin bankar pësoi një rritje të konsiderueshme si pasojë e shtyrjes së kësteve ndërsa kredia e re e akorduar për biznesin dhe individët pësoi një rënie drastike. Por pavarësisht se duket se kërkesa për kredi është pakësuar ndjeshëm, interesat e kredisë së re pësuan një rritje jo të vogël.
Kredia në lekë për bizneset u akordua përkundrejt interesit mesatar prej 6.37% nga 5.18% që ishte dhënë kjo kredi gjatë muajit shkurt. Interesi i kredisë së re në lekë për biznesin u rrit në këtë mënyrë me 119 pikë përqindjeje ose u shtrenjtua me 23% në krahasim me shkurtin. (100 pikë bazë janë të barabarta me 1%).
Kredia e re në euro për biznesin pësoi një rritje të lehtë prej 17 pikë përqindjeje. Biznesi arriti të marrë kredi përkundrejt interesit 4.27%.
Edhe kreditë e reja për individët u shtrenjtuan, por shkalla e shtrenjtimit ishte më e vogël. Kredia e re në këtë segment klientele në lekë u dha për 6.95% mesatarisht me një rritje prej 13 pikë bazë. Kredia në euro për individët u dha përkundrejt interesit 3.85% me një rritje prej 43 pikësh bazë.
Volumi i kredisë së re në Mars ishte 11 miliardë lekë ose 41% më pak se sa në Shkurt. Kredia e re ra si për bizneset ashtu edhe për individët në të gjitha kategoritë e shpenzimeve.
Portofoli i tepricës së kredisë pësoi rritje nga 575 miliardë lekë në Shkurt në 594 miliardë por kjo rritje duket se i dedikohet pezullimit të shlyerjeve të kësteve të zakonshme nga një pjesë e kredimarrësve për shkak të pandemisë.
Shqipëria pezulloi një pjesë të konsiderueshme të aktivitetit ekonomik që nga mesi i muajit Mars për të ndaluar përhapjen e koronavirusit të ri i cili shkakton sëmundjen e COVID-19. Pjesa më e madhe e ekonomisë individuale dhe të bizneseve pritet të vuajë nga bllokimi i punës.
Qeveria shqiptare akordoi një garanci sovrane me vlerë 13 për biznese të ndryshme që do të ishin të gatshme të merrnin kredi për të shlyer pagat e punëtorëve të mbyllur në shtëpi nga pandemia. Por dukshëm kjo kredi nuk është tërhequr nga biznesi.
