Në një deklaratë për shtyp, Policia e Shtetit bëri të ditur se një subjekt tregtar pjesërisht nën pronësinë e L.B. (Lulzim Berisha) në Durrës ka bërë shantazh ndaj konkurrencës në tregtinë e karburantit për anijet, por Operacioni Forca e Ligjit ka vendosur që të “arrestojë” 1.2 milionë litra naftë.
Operacioni Forca e Ligjit, një strukturë policore ekstraligjore ka qëndruar në heshtje prej disa muajsh për shkak se e gjithë vëmendja është tërhequr nga kriza e shkaktuar nga koronavirusi por ditën e Martë më 5 Maj duket se u rikthye bujshëm duke akuzuar në një deklaratë për “shantazh ndaj konkurrencës” dhe “monopol kërcënues” Lulzim Berishën, personi që u dënua fillimisht me burgim përjetë si kreu i bandës së Durrësit dhe fitoi liri me kusht në Dhjetor 2016 pas disa vendimeve të njëpasnjëshme zbutjeje dënimi dhe faljesh.
Në një deklaratë të publikuar në faqen Facebook të Policisë së Shtetit thuhet se subjekti tregtar nën pronësi të L.B & E.SH. kanë kryer veprimtari në sektorin hidrokarbur të furnizimit të anijeve me naftë pavarësisht se u është hequr licenca që në Shkurt të vitit të kaluar, “duke përdorur shantazhin ndaj konkurrencës dhe duke tentuar të krijojë një monopol kërcënues për operatorët e industrisë së peshkimit.”
Por pavarësist se akuzat ndaj Berishës në deklaratën e policisë duket se hyjnë në kategorinë e veprave penale të rënda, Operacioni Forca e Ligjit thotë se ka kryer një operacion sekuestroje të një sasie karburanti që kompania kishte për tregtim.
“Së bashku me Strukturat e Specializuara të Hetimit Financiar në Policinë e Shtetit dhe Doganat, në vijim të luftës kundër informalitetit, evazionit, ushtrimit të aktiviteteve të palicencuara dhe abuzimeve me tregun e hidrokarbureve, mbrëmjen e djeshme OFL sekuestroi 1,2 milion litra naftë dhe një magazinë doganore, në Durrës, në pronësi të subjektit privat L. B. & E. SH,” thuhet në njoftimin e policisë.
“Këtij subjekti, më datë 13.02.2019, me vendimin nr. 85, i ishte revokuar licenca nga autoritetet kompetente shtetërore “Për ushtrimin e veprimtarisë së furnizimit me karburant, për konsum të anijeve në porte”. Pavarësisht revokimit të licencës, subjekti ka vazhduar të ushtrojë në mënyrë të paligjshme aktivitetin e tregtimit të naftës për peshkimin, duke përdorur shantazhin ndaj konkurrencës dhe duke tentuar të krijojë një monopol kërcënues për operatorët e industrisë së peshkimit,” vijon më tej deklarata.
Disa ditë më parë, një numër peshkatarësh në Portin e Durrësit u ankuan për çmimin e lartë me të cilin detyroheshin të blinin karburantin ndërsa rrethanat në të cilat është lejuar krijimi i asaj që policia e quan “monopol kërcënues” në këtë treg mbeten të paqarta. Sipas disa peshkatarëve me të cilët foli BIRN, çmimi i naftës pa akcizë i ofruar për to deri pak ditë më parë ka qenë 60 lekë për litër ndërsa ditët e fundit është u lur në 40 lekë për litër.
BIRN pyeti Policinë për të kuptuar më shumë mbi diskordancat mes akuzave të rënda për shantazh dhe kërcënim dhe lehtësisë së masave të marra, vendosja nën sekuestro e një sasie prej 1.2 milionë litrash karburant dhe një magazine doganore. Një zëdhënës tha se operacioni vijon dhe se Lulzim Berisha është subjekt i Operacionit Forca e Ligjit.
Lulzim Berisha fitoi lirinë në vitin 2016 ndërsa ka hapur në bashkëpronësi me persona të tjerë një kompani hidrokarbure të regjistruar në QKB në Shkurt 2019. Por Policia thotë se pikërisht më 13 Shkurt 2019, kompanisë me “vendimin nr. 85, i ishte revokuar licenca nga autoritetet kompetente shtetërore “Për ushtrimin e veprimtarisë së furnizimit me karburant, për konsum të anijeve në porte”.”
Pavarësisht kësaj, kompania ka vijuar të operojë deri një vit e dy muaj pas revokimit të licencës.
Deklarata nuk bën të ditur se nëse ndaj Berishës është ngritur ndonjë akuzë konkrete dhe as nuk shpjegon se mbi çfarë baze ligjore është vendosur sekuestroja e naftës dhe e magazinës doganore.
Operacioni Forca e Ligjit nisi si një akt normativ, përputhshmëria e të cilit me Kushtetutën e Shqipërisë është vënë në pikëpyetje nga organizatat e shoqërisë civile dhe shumë ekspertë. Që nga krijimi në shkurt 2020, kjo njësi e policisë ka tërhequr vëmendjen e publikut për deklarata të njëpasnjëshme në të cilat është njoftuar dërgimi i formularëve të vetëdeklarimit të pasurisë të disa figurave të njohura apo të dyshuara për aktivitet kriminal. Nuk bëhet e ditur se çfarë efekti ka sjellë në luftën kundër krimit dërgimi i këtyre formularëve.
