ISHP deklaroi se testimet serologjike të deritanishme e nxjerrin 11.2 % nivelin e pozitivitetit të COVID-19, ndërsa paralajmëroi se rezultatet janë paraprake dhe do të ndryshojnë.
Instituti i Shëndetit Publik ka kryer 238 testime në 24 orët e fundit, nga të cilat tetë persona kanë rezultuar prozitivë me COVID-19. Eugena Tomini nga ISHP deklaroi të premten se 3 raste të reja janë identifikuar në Tiranë, 2 raste në Krujë dhe nga një rast në Shkodër, Fier dhe Kamëz.
Testimet e reja e çuan numrin total të të prekurve në 850 persona, nga të cilët 620 janë tashmë të shëruar dhe 199 të tjerë konsiderohen pacientë aktivë. Që prej fillimit të epidemisë, 31 persona kanë humbur betejën me sëmundjen COVID-19 në Shqipëri.
Sipas Tominit, numri i testimeve të kryera nga ISHP është trefishuar dhe niveli i pozitivitetit është nën 5%; çka sipas saj tregon gjurmimin e mirë të rasteve dhe një situatë epidemike nën kontroll.
Tridhjetë pacientë ndodhen aktualisht të shtruar në dy spitalet COVID-1 dhe COVID-2 në Tiranë, duke u trajtuar për simptomat e koronavirusit të ri SARS-CoV-2. Pesë prej pacientëve ndodhen në terapi intensive.
Përveç testimeve të kryera në laboratorin e ISHP-së, autoritetet shëndetësore në Shqipëri po kryejnë edhe testime serologjike mes grupeve të rriskuara në laboratorin biologjik të Qendrës Spitalore Universitare “Nënë Tereza” në Tiranë. Testet serologjike synojnë të gjurmojnë antitrupat e krijuar nga organizimi i një individi pas kontaktit me COVID-19 si dhe të masin përhapjen e virusit në popullatë.
Tomini tha se testimi serologjik ishte kryer për 440 individë, nga të cilët 11.2 për qind rezultuan pozitivë. Megjithatë, Tomini i relativizoi rezultatet e deritanishme të testimeve serologjike duke thënë se ato janë paraprake dhe do të ndryshojnë në ditët në vijim.