Instituti i Shëndetit Publik raporton nivelin më të ulët të pozitivitetit që prej fillimit të epidemisë me 4 qytetarë të prekur nga 243 testime të kryera në të gjithë vendin.
Instituti i Shëndetit Publik raportoi për të dytën ditë radhazi numrin më të ulët të rasteve të reja që prej fillimit të epidemisë së COVID-19; ku katër qytetarë rezultuan pozitivë mes 243 personave të testuar në 24 orët e fundit. Rovena Daja nga ISHP deklaroi gjithashtu se Shqipëria shënoi nivelin më të ulët të pozitivitetit me vetëm 1.6 % të rasteve të dyshuara.
Rastet e reja u shënuan në Tiranë, Krujë dhe Berat, duke e çuar numrin total të të prekurve në Shqipëri në 876 persona. Rreth 78% e të prekurve janë tashmë të shëruar, ndërsa 163 të tjerë konsiderohen pacientë aktivë të COVID-19.
Harta e infeksionit vazhdon të jetë aktive në Tiranë, Krujë, Shkodër dhe Kamëz. Ndërkohë, të prekurit nga qytetet e tjera janë tashmë të shëruar.
Situata është përmirësuar edhe në dy spitalet e vendosura në dispozicion të COVID-19, ku të martën ndodheshin të shtruar vetëm 24 pacientë. Në terapi intensive ndodhet aktualisht vetëm njëri prej tyre.
Instituti i Shëndetit Publik ka kryer që prej fillimit të epidemisë 11 332 testime, nga të cilat 1082 kanë qenë testime molekulare dhe 530 testime serologjike. Testet serologjike, të cilat masin aktivizimin e antikorpeve në trupin e individit janë ende në validim nga Instituti i Shëndetit Publik.
Ministria e Shëndetësisë përsëriti apelin për qytetarët dhe bizneset, që të respektojnë të gjitha masat e distancimit social dhe ato të higjienës. “Bizneset të zbatojnë protokollet e sigurisë për të ruajtur shëndetin e qytetarëve,” deklaroi Daja.