Policia e Elbasanit dyshon se plagosja e 55-vjeçarit Ardjan Çapja dhe gjetja më vonë e një makine në të cilën u dogjën municione dhe një armë, lidhet me ngjarjet e vjetra në qytet. Ndërkohë një zjarrfikës u lëndua nga fishekët, ndërsa tentoi të fikte zjarrin në makinën e autorëve.
Policia e Elbasanit njoftoi të henën se 55-vjeçari Ardjan Çapja ishte paraqitur i plagosur në spitalin e Elbasanit. Çapja siç tha policia nuk ka njoftuar për atentatin dhe se hetimet për këtë kanë nisur pasi është parë se ai kishte në shpatull një plagë me armë zjarri.
Atentati mendohet se ka ndodhur mëngjesin e të hënës. Ardian Çapja 55 vjeç mësohet të ketë marrë një goditje armë ndërsa ishte në ambjentet kompleksit të tij dhe shtëpive të banimit.
Policia njoftoi dje se Çapja kishte mbërritur rreth orës 09.37 në spital dhe konfirmohet gjendja e tij ishte jashtë rrezikut për jetën. Vetëm pak minuta pas mbërritjes së të plagosurit në anën tjetër të qytetit është njoftuar një makinë në zjarr. Në lagjen Skënderbej rreth orës 09.43 është gjetur duke u djegur një mjet tip Volksëagen. Për shuarjen e zjarrit kanë mbërritur mjetet zjarrëfikëse.
Gjatë shuarjes së zjarrit ka pasur shpërthime fishekësh në bagazhin e automjet duke plagosur në këmbë një efektiv zjarrfikës. Gjëndja e tij ndodhet nën kontroll. Sipas të dhënave paraprake goditja mendohet se ka ardhur nga një armë automatike e modifikuar si snajper, e cila është gjetur brenda automjetit të djegur. Një ekip i ekspertizës është duke grumbulluar prova të mundshme në automjetin e djeguar për të mbërritur në identifikimin e autorëve.
Ardjan Çapja dhe anëtarë të familjes së tij janë pjesë e një sërë ngjarjesh të rënda që kanë ndodhur në Elbasan në 16 vitet e fundit. Ndaj Çapjes dhe të afërmve të tij ka pasur një sërë atentatesh, më i rëndi në vitin 2016 kur katër veta përfshi nipa të të plagosurit humbën jetën.
Vetë Çapja është ndaluar disa herë nga policia pasi u akuzua se sulmoi me armë një makinë të saj që patrullonte në zonë, ndërsa të afërm të tij janë arrestuar me akuza për krime të ndryshme, por më pas janë lënë të lirë. Asnjë prej të dyshuarve për një sërë vrasjesh në Elbasan që mendohet se kanë lidhje me përplasjen mes dy grupeve rivale nuk është dënuar.